Britaniyada choy taqchilligi tufayli vahima boshlandi. Odamlar do'kon javonlarida qolgan quruq choylarni zaxiralash uchun sotib olmoqda, chunki import bilan bog‘liq og'ir vaziyat tufayli yetkazib berishda uzilishlar bo‘lishi kutilmoqda.
Savdo shoxobchalari rahbarlari choy ustida janjallar boshlanishidan qo'rqmoqda. Koronavirus pandemiyasi davrida britaniyaliklar hojatxona qog'ozini talashib do‘konlarda janjallar uyushtirgan edi.
Buyuk Britaniyaning eng yirik choy yetkazib beruvchi kompaniyalaridan biri ta'minotni har kuni kuzatib borishini aytdi, chunki import hozirda "og‘ir vaziyatda" va jiddiy ravishda cheklangan. Osiyo, Sharqiy Afrika, Xitoy, Hindiston, Shri-Lanka va Keniyadagi ishlab chiqaruvchilarning choy yetkazib berishlari Qizil dengizdagi husiylar hujumlari tufayli to'xtab qolgan. Yuk kemalarining Suvaysh kanali orqali Yevropaga o'tishida to'sqinlik yuzaga kelmoqda.
Import qiluvchi davlatlar dekabr oyida ushbu ssenariyga tayyorgarlik ko'rishni boshlaganiga qaramay, hozirgi paytda vaziyat kutilganidan ancha yomonroq. Buyuk Britaniyaga choy yetkazib beruvchi kompaniyalarning ta'kidlashicha, defitsit yuzaga kelishidan qo‘rquv tufayli odamlar odatdagidan ko'proq choy sotib olishni boshlagan. Bunday vaziyatda, javonlar bo'shab qolishi tabiiy hol.
Ammo ba'zi do'konlarda allaqachon bo'sh javonlar mavjud va yetkazib berish muammolari haqida e'lonlar joylashtirilgan, bu esa britaniyaliklar orasida yanada ko'proq vahima uyg'otgan. Statistik ma'lumotlarga ko'ra, Buyuk Britaniyada har kuni taxminan 100 million finjon choy ichiladi, deb yozadi Daily Star.
Izoh (0)