13-fevral kuni Birlashgan Millatlar Tashkilotining xalqaro yordam bo‘limi rahbari Martin Griffits Rafahdagi harbiy amaliyotlar ommaviy qirg‘inga olib kelishi va G‘azodagi gumanitar sa’y-harakatlarni nochor ahvolda qoldirishi haqida ogohlantirdi. Bu haqda CNN nashri xabar bermoqda.
BMT vakilining so‘zlari Isroilning Rafahdagi potensial quruqlik hujumiga qarshi kuchayib borayotgan xalqaro qarshilik bilan bir paytda yangramoqda. Janubiy G‘azo hududida to‘planib qolgan 1 milliondan ortiq falastinliklar bilan bog‘liq og‘ir vaziyat Isroil, Misr, Iordaniya va Qatar rahbariyatlarini muzokaralar boshlashga undagan edi.
“Butun G‘azo aholisi kabi, Rafahda yig‘ilganlar ham shafqatsizlik va tajovuzkorlikda tengsiz bo‘lgan hujum qurboni bo‘lishdi. Isroil xalqaro hamjamiyatning quruqlikdagi bosqinning xavfli oqibatlari haqidagi ogohlantirishlariga quloq solishi kerak. Aks holda, tarix Isroil rejimiga ortiq toqat qilmaydi”, — degan Martin Griffits.
Isroil mudofaa kuchlari bayonotiga ko‘ra, harbiylar Rafahda yig‘ilganlarni evakuatsiya qilish bo‘yicha o‘z rejasini hozircha hukumatga taqdim etmagan. Hozirda tinch aholini HAMAS jangarilaridan ajratib olishga imkon beradigan reja ishlab chiqish ustida ishlanayotgani aytilmoqda.
Izoh (0)