Qashqadaryo viloyatining Qarshi tumanidagi mahallada 25 yil davomida qarovsiz yotgan eski klub o‘rnida muhtasham madaniyat markazi ish boshladi. Bu haqda “Daryo”ga hokimlik axborot xizmati xabar berdi.
Ma’lum bo‘lishicha, tadbirda viloyat hokimi Murodjon Azimov ham ishtirok etib, madaniyat va ma’naviyat markazi prezident Shavkat Mirziyoyev raisligida o‘tkazilgan videoselektordagi topshiriq ijrosini ta’minlash maqsadida ochilganini bildirgan.
Prezidentimiz raisligida ijtimoiy sohalardagi ustuvor vazifalar muhokamasi yuzasidan o‘tkazilgan videoselektor yig‘ilishida kutubxonasi va to‘garak xonalari bo‘lgan madaniyat markazlari barpo etish, hududlarda madaniy tadbirlar o‘tkazish hamda yoshlarni san’atga jalb qilish masalalari qayd etib o‘tilgandi. Biz aynan shu maqsad yo‘lida bu markazni tashkil qildik, — deydi viloyat hokimi Murodjon Azimov.
To‘rt ming nafarga yaqin aholi istiqomat qiladigan “Charog‘il” mahallasida o‘tgan asrning 70-yillarida qurilgan ushbu klub 25 yil davomida xaroba holatda yotgan. Ushbu markazning qurilish-ta’mirlash ishlariga 4 milliard so‘mdan ortiq mablag‘ sarflangan.
Tuman aholisining ijtimoiy-ma’naviy faolligini qo‘llab-quvvatlash, ularning maroqli dam olishini tashkil etish, yosh avlodni milliy va jahon san’atining nodir namunalaridan bahramand etish, mahalla ahli, xususan, yoshlarning madaniyati, ma’naviyati hamda ma’rifatini yanada yuksaltirishga xizmat qiluvchi ushbu maskanda tikuvchilik, to‘quvchilik, rassomchilik, musiqa va estrada to‘garagi, shaxmat-shashka, qandolatchilik, kasanachilik, ingliz tili o‘quv kurslari, IT kurslari, 2400 ga yaqin badiiy hamda ilmiy adabiyotlar mavjud kutubxona faoliyati ham yo‘lga qo‘yilgan. To‘garaklarda 200 nafarga yaqin yoshlar qamrab olinishi rejalashtirilgan, — deydi tuman hokimligi axborot xizmati rahbari To‘lyin Turdiyev.
Qo‘shimcha qilinishicha, bu yerda, shuningdek, Ma’naviyat maskani ham tashkil etilib, Respublika Ma’naviyat va ma’rifat markazi Qarshi tumani bo‘linmasi ixtiyoriga berilgan.
Izoh (0)