Қашқадарё вилоятининг Қарши туманидаги маҳаллада 25 йил давомида қаровсиз ётган эски клуб ўрнида муҳташам маданият маркази иш бошлади. Бу ҳақда “Дарё”га ҳокимлик ахборот хизмати хабар берди.
Маълум бўлишича, тадбирда вилоят ҳокими Муроджон Азимов ҳам иштирок этиб, маданият ва маънавият маркази президент Шавкат Мирзиёев раислигида ўтказилган видеоселектордаги топшириқ ижросини таъминлаш мақсадида очилганини билдирган.
Президентимиз раислигида ижтимоий соҳалардаги устувор вазифалар муҳокамаси юзасидан ўтказилган видеоселектор йиғилишида кутубхонаси ва тўгарак хоналари бўлган маданият марказлари барпо этиш, ҳудудларда маданий тадбирлар ўтказиш ҳамда ёшларни санъатга жалб қилиш масалалари қайд этиб ўтилганди. Биз айнан шу мақсад йўлида бу марказни ташкил қилдик, — дейди вилоят ҳокими Муроджон Азимов.
Тўрт минг нафарга яқин аҳоли истиқомат қиладиган “Чароғил” маҳалласида ўтган асрнинг 70 йилларида қурилган ушбу клуб 25 йил давомида хароба ҳолатда ётган. Ушбу марказнинг қурилиш-таъмирлаш ишларига 4 миллиард сўмдан ортиқ маблағ сарфланган.
Туман аҳолисининг ижтимоий-маънавий фаоллигини қўллаб-қувватлаш, уларнинг мароқли дам олишини ташкил этиш, ёш авлодни миллий ва жаҳон санъатининг нодир намуналаридан баҳраманд этиш, маҳалла аҳли, хусусан, ёшларнинг маданияти, маънавияти ҳамда маърифатини янада юксалтиришга хизмат қилувчи ушбу масканда тикувчилик, тўқувчилик, рассомчилик, мусиқа ва эстрада тўгараги, шахмат-шашка, қандолатчилик, касаначилик, инглиз тили ўқув курслари, IT курслари, 2400 га яқин бадиий ҳамда илмий адабиётлар мавжуд кутубхона фаолияти ҳам йўлга қўйилган. Тўгаракларда 200 нафарга яқин ёшлар қамраб олиниши режалаштирилган, — дейди туман ҳокимлиги ахборот хизмати раҳбари Тўлйин Турдиев.
Қўшимча қилинишича, бу ерда, шунингдек, Маънавият маскани ҳам ташкил этилиб, Республика Маънавият ва маърифат маркази Қарши тумани бўлинмаси ихтиёрига берилган.
Изоҳ (0)