Oliy Majlis Senatining 50-yalpi majlisida “Xalqaro mehnat tashkilotining Ish haqini himoya qilish to‘g‘risidagi 95-sonli konvensiyasini ratifikatsiya qilish haqida”gi qonun ko‘rib chiqilib, ma’qullandi.
-TEusU_PI.jpg)
Konvensiya ish beruvchilar tomonidan pul shaklida ish haqi o‘z vaqtida to‘lanishini taʼminlashga qaratilgan. Konvensiya qoidalari ish haqi to‘lanadigan yoki to‘lanishi lozim bo‘lgan barcha shaxslarga nisbatan qo‘llaniladi. Konvensiya iqtisodiy faoliyatning barcha sohalari va ishchilar toifalariga tatbiq etiladi.
Senat matbuot xizmatining ma’lum qilishicha, muhokama davomida konvensiyada ish haqini qarz majburiyatlari, tilxat, kupon yoki boshqa shaklda, shuningdek, tarkibida alkogol miqdori yuqori bo‘lgan spirtli ichimliklar, organizm uchun zararli giyohvand moddalar ko‘rinishida to‘lash taqiqlangani taʼkidlandi.
Senatorlar konvensiya normalari O‘zbekiston qonunchiligiga, shuningdek, “O‘zbekiston – 2030” strategiyasining maqsad va vazifalariga to‘liq mos kelishini qayd etdi.
Muhokama chog‘ida konvensiyaning ratifikatsiya qilinishi mehnatkashlar huquqlarini himoya qilish bo‘yicha qo‘shimcha kafolatlar yaratishga imkon berishi, mehnatni muhofaza qilish milliy tizimini yanada takomillashtirishga salmoqli turtki berishi aytib o‘tildi.
Senatorlar konvensiyaning ratifikatsiya qilinishi mehnat sohasidagi milliy qonunchilikni takomillashtirish va xalqaro mehnat standartlarini samarali joriy etishni taʼminlashga xizmat qilishini, shuningdek, O‘zbekistonning xodimlar huquqlari kafolatlarini taʼminlash bo‘yicha asosiy xalqaro prinsip va standartlarga sodiqligini ko‘rsatishini alohida taʼkidladi.
Ushbu konvensiya jahonning 99 ta davlati tomonidan ratifikatsiya qilingan.
Izoh (0)