Қашқадарёда онкологик касалликларни эрта босқичда аниқлаган тиббиёт бригадаларига ҳар бир аниқланган ҳолат учун бериладиган пул мукофоти маълум қилинди.
Президентнинг 9 февралдаги қарорига кўра, 1 майдан бошлаб онкологик касалликларни эрта босқичда аниқлаган тиббиёт бригадалари ҳар бир аниқланган ҳолат учун Тиббиёт муассасаларининг моддий рағбатлантириш ва ривожлантириш жамғармаси маблағлари ҳисобидан 2 миллион сўм миқдорида рағбатлантирилади.
Соғлиқни сақлаш вазирлиги Иқтисодиёт ва молия вазирлиги билан биргаликда 2024 йил 1 мартга қадар онкологик касалликларни эрта босқичда аниқлаган тиббиёт бригадаларини рағбатлантириш тартибини тасдиқлаши лозим.
Шавкат Мирзиёев раислигида 5 февраль куни бўлиб ўтган видеоселектор йиғилишида касалликларни эрта аниқлаш, жумладан, кардиология, эндокринология ва онкология скринингларини ташкил этишда йўл қўйилаётган камчиликлар кўрсатиб ўтилганди.
2023 йилда онкология касаллиги билан рўйхатга олинган беморларнинг қарийб ярмида касаллик кеч аниқлангани, жойларда диспансер назоратида турган, сурункали касаллиги бор аҳолини соғломлаштириш ишлари етарли эмаслиги қайд этилганди.
Йиғилишда онкология бўйича ҳар бир эрта аниқланган ҳолат учун тиббиёт бригадаларига мукофот бериш жорий қилиниши, бу тажриба 1 майдан Қашқадарёда бошланиб, келгуси йилдан бошқа ҳудудларда йўлга қўйилиши маълум қилинганди.
Изоҳ (0)