Sog‘liqni saqlash vazirligi Janubiy Koreya Eksimbankining Iqtisodiy rivojlanish va hamkorlik jamg‘armasi bilan moliyaviy hamkorlikda “Milliy onkologiya markazini barpo etish” loyihasini amalga oshirish chora-tadbirlari to‘g‘risida”gi prezident qarori loyihasini muhokamaga qo‘ydi.
Hujjat bilan Koreya Respublikasi Hukumati tomonidan 2019-yil 27-iyunda Koreya Eksimbankining Iqtisodiy rivojlanish va hamkorlik jamg‘armasi (EDCF jamg‘armasi) tomonidan “Milliy onkologiya markazini barpo etish” loyihasini amalga oshirish uchun O‘zbekistonga 10 yil imtiyozli davr bilan 40 yil muddatga yillik 0,1 foiz stavkasida jami 127,5 million dollar ekvivalentidan oshmaydigan Koreyaning von pul birligi miqdorida imtiyozli qarz ajratilishi maʼqullanadi.
Shuningdek, O‘zbekiston hukumati va EDCF jamg‘armasi o‘rtasida 2021-yil 31-dekabrda loyiha yuzasidan qarz bitimi imzolangan. O‘zbekiston Adliya vazirligi imzolangan qarz bitimi bo‘yicha belgilangan tartibda yuridik xulosa taqdim etgani maʼlumot uchun qabul qilinadi.
O‘zbekiston Sog‘liqni saqlash vazirligi EDCF qarzidan maqsadli foydalanish hamda loyihani samarali amalga oshirish uchun mas’ul ijro etuvchi organ, Tashqi iqtisodiy faoliyat milliy banki esa EDCF qarzi bo‘yicha hisob-kitoblarni amalga oshirish borasida moliyaviy agent hisoblanadi.
EDCF jamg‘armasi bo‘yicha asosiy qarz, unga hisoblangan foiz, vositachilik haqi hamda boshqa to‘lovlarni qoplash bilan bog‘liq xarajatlar O‘zbekiston budjetidan qoplanadi. Loyihani amalga oshirish doirasida xarid qilinadigan va olib kiriladigan tovarlarga (xizmatlarga) to‘lanishi lozim bo‘lgan qo‘shilgan qiymat solig‘i O‘zbekiston hissasi sifatida belgilangan tartibda davlat budjetidan to‘lanadi (agar qonunchilik hujjatlarida ushbu soliq bilan bog‘liq imtiyoz nazarda tutilmagan bo‘lsa).
Iqtisodiyot va moliya vaziriga O‘zbekiston nomidan Sog‘liqni saqlash vazirligi va O‘zmilliybank (moliyaviy agent) o‘rtasida EDCF qarzidan foydalanish va xizmat ko‘rsatish bo‘yicha agentlik bitimini imzolash vakolati beriladi. O‘zmilliybankka EDCF qarzi bo‘yicha hisob-kitoblarni amalga oshirish uchun Koreya vakolatli banki bilan banklararo shartnomani imzolash vakolati beriladi.
Avgust o‘rtalarida O‘zbekiston va Hindiston Samarqandda zamonaviy saraton markazi tashkil etishni rejalashtirayotgani to‘g‘risida xabar berilgandi. Shuningdek, mamlakatda tibbiyotga ajratiladigan yillik mablag‘ hajmi ikki barobar oshirilishi aytilgan edi.
Izoh (0)