Toshkent shahri hokimligi Yangihayot tumanida qurilishi boshlanib, keyinroq ishi to‘xtab qolgan Minerva City majmuasini qurayotgan hindistonlik tadbirkor ustidan sudda yutib chiqqani ma’lum bo‘ldi. Bu haqda tuman hokimi Hayot Inog‘omov 8-fevral kuni hokimlikda tashkil etilgan matbuot anjumanida ma’lum qildi.
“Gazeta.uz”ning yozishicha, qurilishga ajratilgan 100 gektar maydon davlat tasarrufiga qaytarilgan.
2022-yilda hindistonlik investor Murari Lal Jalanning MJ Developer kompaniyasi tomonidan Yangihayot tumanida qurilishi boshlangan Minerva City loyihasi mojaroli tarzda to‘xtab qolgandi. Yer hindistonlik tadbirkordan olib qo‘yilgach, Toshkentning o‘sha vaqtdagi hokimi Jahongir Ortiqxo‘jayevni o‘ziga nisbatan noqonuniy talab qo‘yishda ayblagan. Toshkent shahar hokimligi investorning so‘zlarini rad etib, Bosh prokuraturaga murojaat qilgandi. Shundan so‘ng, Bosh prokuratura Murari Lal Jalanning iddaosini tekshirishni boshladi.
Tuman hokimi sud natijasiga ko‘ra, yer Toshkent shahar hokimligi balansiga qaytarilganini aytib o‘tgan.
‘Minerva City’ni 29-yanvar kuni oxirgi sud ishida yutdik. Qaror bekor qilinib, yer Toshkent shahar hokimligi balansiga qaytarildi, ya’ni davlatga qaytdi. Undan keyin ular yana apellyatsiyaga berishdi. Hozir biz shu apellyatsiyani kutyapmiz. Lekin apellyatsiya shikoyatini o‘qib chiqsak, huquqiy tomondan yutadigan vajlarni ko‘rsatishmagan. Yaqin 15 kunda sudning oxirgi qarori bizga hal bo‘ladi. Yer davlatga o‘zi qaytib bo‘lgan, apellyatsiya arizasi berilgani uchun sud uni qayta ko‘rib chiqmoqda”, — deydi Hayot Inog‘omov.
Uning aytishicha, olti nafar fuqarodan tashqari qolgan hammaga kompaniyaning o‘zi pulni qaytarib bergan. Ular rozi bo‘lib, o‘sha to‘langan pulni olib chiqib ketgan. Olti kishi esa olishni xohlamagan. Sudda ham ishtirok etgan.
Hokimning aytishicha, davlatga qaytarilgan maydonda yana uy-joy quriladi, shuningdek, uning yonida oliygoh qad rostlashi mumkin.
Joyning o‘rnida nima bo‘ladi degan savolga kelsak, Xitoyga borganda buni investorlarga ko‘rsatdik. Unga pul tikaman, degan investor bor. Taxminan 96−100 gektar joyda uy-joy bo‘ladi. 35−40 ming fuqaro yashaydigan xonadonlar tushishi reja qilinmoqda. Uning ichida barcha xizmat ko‘rsatish obyektlari bo‘ladi. Hali u darajaga yetmagan bo‘lsak ham, uning yoniga bir universitet olib kelmoqchimiz. Bizning tumanda ham bitta oliygoh bo‘lsa, tumanda ziyolilar soni ko‘payadi, — deydi tuman hokimi.
2018-yilning 28-sentyabr kuni MJ Developers O‘zbekiston hukumati bilan 100 million dollarlik sarmoya shartnomasini imzolab, o‘zining 4 ta yirik loyihasiga sarmoya kiritishni boshlagandi. Dastlab Buxoroda 5 yulduzli mehmonxona qurilishi, keyinroq Namanganda Namangan Square, Toshkentda Minerva City “aqlli” shaharchalari hamda Bektemir tumanida Lake City sun’iy ko‘li qurilishi boshlangan.
Izoh (0)