Qatar Airways Dohadan Toshkentga muntazam parvozlarni yo‘lga qo‘yishi haqida xabar berilgan edi. Uzbekistan Airports parvozlar qachondan boshlanishini ma’lum qildi.
Unda aytilishicha, birinchi parvoz 2024-yil 2-iyunga belgilangan. Yo‘lovchi reyslari haftasiga to‘rt marta — dushanba, chorshanba, juma va yakshanba kunlari Airbus A320 samolyotlarida amalga oshiriladi.
Biz uchun bu darajadagi yirik aviakompaniyaning Toshkent aeroportiga parvoz qilishi juda muhim. Biz har yili nafaqat reyslar geografiyasini kengaytirish, balki xorijiy aviatashuvchilar sonini ko‘paytirish, bozorda sog‘lom raqobatni rivojlantirish va shu bilan birga, yo‘lovchilarga xizmat ko‘rsatish sifatini yaxshilash ustida ish olib boramiz, — deyiladi Uzbekistan Airports xabarida.
Qatar Airways bosh qarorgohi Dohada joylashgan Qatar milliy aviakompaniyasi hisoblanadi. Aviakompaniya dunyo bo‘ylab 170 dan ortiq yo‘nalishlarga parvoz qiladi. Ushbu aviakompaniya ko‘plab nufuzli mukofotlarni qo‘lga kiritgan va Skytrax tomonidan yetti marta dunyoning eng yaxshi aviakompaniyasi deb topilgan.
2021-yilning iyunida O‘zbekiston va Qatar hukumatlari o‘rtasida “Havo qatnovi to‘g‘risida”gi bitim imzolangandi. Unda Doha—Toshkent—Doha yo‘nalishida to‘g‘ridan to‘g‘ri aviaqatnovlarni yo‘lga qo‘yish ko‘zda tutilgan. O‘sha yilning sentyabrida aviakompaniya O‘zbekistonga muntazam aviaqatnovlarini amalga oshirish uchun ruxsatnoma oldi.
2023-yilning iyunida Qatarning O‘zbekistondagi elchisi Hasan Hamza Asad Muhammad Hoshim Transport vaziri Ilhom Mahkamov bilan uchrashuvda Qatar Airways Doha—Toshkent—Doha yo‘nalishida aviaqatnovlarni amalga oshirish bo‘yicha kompaniya ichki tartiblarini ishlab chiqayotganini ma’lum qilgandi.
Izoh (0)