Тошкент шаҳри ҳокимлиги Янгиҳаёт туманида қурилиши бошланиб, кейинроқ иши тўхтаб қолган Minerva City мажмуасини қураётган ҳиндистонлик тадбиркор устидан судда ютиб чиққани маълум бўлди. Бу ҳақда туман ҳокими Ҳаёт Иноғомов 8 февраль куни ҳокимликда ташкил этилган матбуот анжуманида маълум қилди.
“Газета.уз”нинг ёзишича, қурилишга ажратилган 100 гектар майдон давлат тасарруфига қайтарилган.
2022 йилда ҳиндистонлик инвестор Мурари Лал Жаланнинг МЖ Девелопер компанияси томонидан Янгиҳаёт туманида қурилиши бошланган Minerva City лойиҳаси можароли тарзда тўхтаб қолганди. Ер ҳиндистонлик тадбиркордан олиб қўйилгач, Тошкентнинг ўша вақтдаги ҳокими Жаҳонгир Ортиқхўжаевни ўзига нисбатан ноқонуний талаб қўйишда айблаган. Тошкент шаҳар ҳокимлиги инвесторнинг сўзларини рад этиб, Бош прокуратурага мурожаат қилганди. Шундан сўнг, Бош прокуратура Мурари Лал Жаланнинг иддаосини текширишни бошлади.
Туман ҳокими суд натижасига кўра, ер Тошкент шаҳар ҳокимлиги балансига қайтарилганини айтиб ўтган.
‘Minerva City’ни 29 январь куни охирги суд ишида ютдик. Қарор бекор қилиниб, ер Тошкент шаҳар ҳокимлиги балансига қайтарилди, яъни давлатга қайтди. Ундан кейин улар яна апелляцияга беришди. Ҳозир биз шу апелляцияни кутяпмиз. Лекин апелляция шикоятини ўқиб чиқсак, ҳуқуқий томондан ютадиган важларни кўрсатишмаган. Яқин 15 кунда суднинг охирги қарори бизга ҳал бўлади. Ер давлатга ўзи қайтиб бўлган, апелляция аризаси берилгани учун суд уни қайта кўриб чиқмоқда”, — дейди Ҳаёт Иноғомов.
Унинг айтишича, олти нафар фуқародан ташқари қолган ҳаммага компаниянинг ўзи пулни қайтариб берган. Улар рози бўлиб, ўша тўланган пулни олиб чиқиб кетган. Олти киши эса олишни хоҳламаган. Судда ҳам иштирок этган.
Ҳокимнинг айтишича, давлатга қайтарилган майдонда яна уй-жой қурилади, шунингдек, унинг ёнида олийгоҳ қад ростлаши мумкин.
Жойнинг ўрнида нима бўлади деган саволга келсак, Хитойга борганда буни инвесторларга кўрсатдик. Унга пул тикаман, деган инвестор бор. Тахминан 96−100 гектар жойда уй-жой бўлади. 35−40 минг фуқаро яшайдиган хонадонлар тушиши режа қилинмоқда. Унинг ичида барча хизмат кўрсатиш объектлари бўлади. Ҳали у даражага етмаган бўлсак ҳам, унинг ёнига бир университет олиб келмоқчимиз. Бизнинг туманда ҳам битта олийгоҳ бўлса, туманда зиёлилар сони кўпаяди, — дейди туман ҳокими.
2018 йилнинг 28 сентябрь куни МJ Developers Ўзбекистон ҳукумати билан 100 миллион долларлик сармоя шартномасини имзолаб, ўзининг 4 та йирик лойиҳасига сармоя киритишни бошлаганди. Дастлаб Бухорода 5 юлдузли меҳмонхона қурилиши, кейинроқ Наманганда Namangan Square, Тошкентда Minerva City “ақлли” шаҳарчалари ҳамда Бектемир туманида Lake City сунъий кўли қурилиши бошланган.
Изоҳ (0)