Қозоғистон ҳукумати истеъфога чиқди

Қозоғистон ҳукумати 5 февраль куни истеъфога чиқди. Президент Қосим-Жўмарт Тўқаев тегишли фармонни имзолади. Бу ҳақда “Оқўрда” хабар берди.

Республика раҳбари Роман Склярни вақтинчалик бош вазир вазифасини бажарувчи этиб тайинлади.

“Қозоғистон Республикаси конституциясининг 70-моддасига мувофиқ қарор қиламан:

1. Қозоғистон республикаси ҳукуматининг истеъфоси қабул қилинсин.
2. Қозоғистон республикаси бош вазирининг вазифалари вақтинча Роман Василевич Скляр зиммасига юклансин.
3. Қозоғистон республикаси ҳукумати аъзолари ҳукуматнинг янги таркиби тасдиқланмагунча ўз вазифаларини бажаришда давом этадилар.
4. Мазкур фармон имзоланган кундан эътиборан кучга киради”, — дейилади Тўқаев имзолаган фармон матнида.

Роман Скляр 1971 йил 8 майда Павлодарда туғилган. 2023 йил 3 апрелдан Қозоғистон бош вазирининг биринчи ўринбосари лавозимида ишлаб келган. Эслатиб ўтамиз, ҳукумат раҳбари лавозимини Алихон Смоилов эгаллаб турганди.

Алихон Смоилов 2022 йил 11 январдан Вазирлар Маҳкамаси раҳбари лавозимида ишлаб келаётганди. Унинг янги лавозимидаги илк ҳаракатларидан бири 180 кун давом этган ёнилғи нархларини давлат томонидан тартибга солиш бўлди. Январь воқеалари пайтида қозоғистонликларнинг норозилигига расмий сабаб айнан суюлтирилган газ нархининг ошиши бўлганини ҳисобга олса, буни ҳукуматнинг адекват жавоби деб баҳолаш мумкин.

Қўшни республикада 7 февраль куни ҳукуматнинг кенгайтирилган йиғилиши бўлиб ўтади. 

Сенат мажлиси чоғида парламент юқори палатаси спикери Маулен Ашимбаев ҳукуматнинг кенгайтирилган йиғилиши 7 февраль куни бўлиб ўтишини маълум қилган.

Аввалроқ президент Қосим-Жўмарт Тўқаев йил бошида эълон қилинган интервьюсида ҳукуматнинг кенгайтирилган йиғилиши ўтказилишини айтганди. У сентябрдаги мурожаатномасида янги иқтисодий моделга ўтиш вазифаси қўйилганини таъкидлаган. Стратегик мақсад 2029 йилга келиб ЯИМни икки баробарга оширишдир.

“Яқинда ҳукуматнинг кенгайтирилган йиғилиши бўлиб ўтади, унда биз ижтимоий-иқтисодий ривожланиш якунларини сарҳисоб қиламиз ва бу борадаги кейинги ҳаракатлар тактикасини белгилаймиз”, — деган эди Қосим-Жўмарт Тўқаев.