O‘zbek milliy akademik drama teatri aktrisasi Nigina Anorboyeva “O‘zimizning gap” ko‘rsatuviga bergan intervyusida ilk marta shaxsiy hayoti haqida so‘zlab berdi.
![](/static/2024/02/02/photo_2024-02-02_10-54-40-69DtTKj_.jpg)
Aktrisa turk millatiga mansub turmush o‘rtog‘i bilan e’tiqodi bir xil bo‘lgani uchun til topishga qiynalmasligi haqida so‘zlab berdi.
— Turmush o‘rtog‘im turk millatiga mansub. Menda esa o‘zbek va qozoq qoni bor. Turmush o‘rtog‘im Yevropada ko‘p yillar yashaganlar, Rossiyada ham ishlaganlar, shuning uchun rus tilini juda yaxshi biladilar. Ba’zi bir qarashlarimiz farqli. Lekin nima bo‘lganida ham sharqona millatmiz ikkimiz ham. E’tiqodimiz ham bir xil. Ko‘pchilik vaziyatdan shu narsa olib chiqib ketadi. Turmush o‘rtog‘imning dilidagi tilida. Ular o‘ylagan narsalarini gapiradilar. Avvallari men o‘zimni shunaqaman, deb o‘ylardim. Ular bilan turmush qurganimdan so‘ng mendan ham ko‘ra ular o‘ylaganini gapiradigan inson ekanliklarini bildim.
![](/static/2024/02/02/photo_2024-02-02_11-17-40-aEKJmwMK.jpg)
Bundan tashqari aktrisa kelajakda boshqa shaharga ko‘chib ketish ehtimolini ham inkor qilmadi.
— Hozircha turmush o‘rtog‘imning ishi shu yerda. Bundan tashqari ular Toshkentni juda ham yoqtiradilar. Qizimiz ham hali juda kichkina. Shuning uchun ham hozircha shu yerdamiz. Keyinchalik esa qayerda yashashimizni vaqt ko‘rsatadi.
Nigina Anorboyeva turmush o‘rtog‘i bilan qanday tanishgani haqida ham so‘zlab berdi.
— Turkiyaga ijodiy safar bilan borganimizda tanishib qoldik. Shunchaki do‘stona munosabat ijtimoiy tarmoqlardagi yozishmalardan sevgiga aylandi. Ular O‘zbekistonga kelib, ko‘rishishni taklif qildilar. Shundan keyin hammasi o‘z-o‘zidan bo‘lib ketdi. Taqdir bo‘lsa hech gap emas ekan. Turmush o‘rtog‘im kasbimni hurmat qiladi, bu borada menga hech qanday taqiq qo‘ymaydi.
Aktrisa kelinlik davrida turmush o‘rtog‘ining qo‘llab-quvvatlovi tufayli qiynalmagani haqida ham gapirib o‘tdi.
— Menda kelinlik davri bo‘lmadi. Chunki turmush o‘rtog‘imning onalari Turkiyada shifokor bo‘lib ishlaydilar. Biz turmush o‘rtog‘im bilan yolg‘iz yashaymiz. Ular homiladorlik davrimda menga o‘zgacha mehr berib, juda katta yordam berdilar. Bu narsa turmush o‘rtog‘imga bo‘lgan mehrimning ortishiga sabab bo‘ldi. Ular Fransiyada o‘qigan professional oshpaz bo‘lganliklari uchun ko‘pincha uyda ovqatlarni o‘zlari tayyorlaydilar. Men ham ularga moshxo‘rda va gulyash tayyorlab beraman, chunki turmush o‘rtog‘im aynan shu taomlarni sevib iste’mol qiladilar. Baxtimga ular xamir ovqatlarni umuman yoqtirmaydilar.
Shuningdek, aktrisa intervyu davomida birinchi turmushi muvaffaqiyatsizlikka uchragach, onasi uni qo‘llab-quvvatlagani haqida ham so‘zlab bergan.