Европа Иттифоқи давлатлари бир йил олдин ваъда қилинган миллионта снаряддан атиги 500 мингдан кўпроғини Украинага март ойигача етказиб беради. Бу ҳақда Европа дипломатияси раҳбари Жозеп Боррел ЕИ мудофаа вазирлари йиғилишидан сўнг ўтказилган брифингда маълум қилди.
“Ўтган йили Европа Иттифоқи давлатлари бир йил ичида Украинага бир миллион снаряд етказиб беришни ваъда қилганди. Аъзо мамлакатлардан олинган сўнгги маълумотларга кўра, ўтган йилнинг март ойидан ҳозиргача 330 минг снаряд етказиб бердик – бу мақсадимизнинг учдан бир қисмидир. Март ойига қадар яна 200 минг дона етказиб берилиши кутилмоқда. Уларнинг умумий сони 530 мингга етади, бу мақсаднинг 50 фоиздан сал кўпроқни ташкил этади”, — деди Боррел.
Европа дипломатияси раҳбарининг таъкидлашича, бутун “Европа мудофаа машинаси” йил охиригача ЕИ давлатлари Украинага бир миллиондан ортиқ снаряд ўтказиш имкониятига эга бўлишини таъминлаш устида ишламоқда.
Боррел, шунингдек, Европа Иттифоқи давлатлари 2024 йилда Украинага ёрдам бериш учун аллақачон 21 миллиард евро ваъда қилганини айтди. Унинг сўзларига кўра, бу минимал кўрсаткич, чунки ҳали аъзо давлатларнинг ҳаммаси ҳам Киевни қўллаб-қувватлаш режалари ҳақида маълумот бермаган.
2023 йил март ойида Европа Иттифоқи Украинага 12 ой ичида аввал мавжуд захиралардан, сўнгра қўшма харид шартномалари ва саноат қувватини ошириш орқали бир миллион артиллерия снарядларини етказиб беришга ваъда берганди.
Ноябрь ойида Bloomberg ЕИ ўз ваъдасини бажариши даргумон, деб ёзди. Украина ташқи ишлар вазири Дмитрий Кулеба Европа Иттифоқи “мудофаа саноатининг аянчли аҳволи” туфайли 2024 йилнинг мартига қадар бир миллионта артиллерия снарядларини етказиб бера олмаслигини тасдиқлади.
Январь ойи бошида Жозеп Боррел бошчилигидаги Европа ташқи ҳаракатлар хизмати Европа Иттифоқига аъзо давлатларнинг Украинага ҳарбий ёрдами аудитини текширишни бошлади, деб ёзади Financial Times. Текширув қарори Германия канцлери Олаф Шольцнинг Европа давлатларининг Киевга ҳарбий юкларини солиштиришни талаб қилган баёнотидан кейин қабул қилинди.
Европанинг бешта давлати – Германия, Дания, Чехия, Эстония ва Нидерландия етакчилари Европа Иттифоқининг бошқа давлатларига очиқ хат ёзиб, уларни Украинани қуроллантириш бўйича жамоавий саъй-ҳаракатларни амалга оширишга, шунингдек, ўқ-дорилар етказиб беришни осонлаштирадиган ташаббусларни молиялаштиришга чақирди.
Изоҳ (0)