Joriy yilning 24-yanvar kuni Eron prezidenti Ibrohim Raisi Turkiya rahbari Rajab Toyyib Erdo‘g‘on bilan uchrashdi. Siyosatshunos Ravshan G‘oziyev “Daryo” bilan suhbatda Turkiya va Eron rahbarlari o‘zaro muhokama qilgan asosiy mavzulardan biri – Ozarbayjon orqali o‘tuvchi Zangazur yo‘lagi ekanligini aytib o‘tdi.
Siyosatshunosning ta’kidlashicha, Eron Zangazur yo‘lagi ishga tushishiga qarshilik qilmoqda.
“Turkiya va Eron kelisha olmaydigan yana bir siyosiy masala – bu Zangazur yo‘lagi. Eron ushbu logistik yo‘lak ishga tushishiga qarshilik qilmoqda. Chunki bu yo‘lak ishga tushsa, Erondan o‘tuvchi tranzit yo‘llarining mavqe tushib ketishi mumkin. Bundan tashqari, mintaqada Turkiya va Ozarbayjonning mavqeyi ortib ketadi. Hozir Turkiya Eronni ko‘ndirishga urinmoqda”, – deydi Ravshan G‘oziyev.
Zangazur yo‘lagining ahamiyati
Ozarbayjonning Zangazur yo‘lagi, ko‘p tarmoqli transport yo‘nalishi Turkiya va Markaziy Osiyo o‘rtasida yuklarni yetkazib berishni osonlashtirishda muhim o‘rin tutadi. Ushbu yo‘lak barcha mintaqaviy ishtirokchilarga yuklarning yarmidan ko‘pini Turkiyadan Markaziy Osiyoga, asosan, Ozarbayjon hududi orqali olib o‘tadigan noyob yo‘nalish sifatida foydalanishdagi ahamiyati yuqori.
Ushbu koridorning ishga tushirilishi bilan Iroq, Suriya va O‘rta Yer dengizining janubiy portlaridan Turkiya orqali tranzit o‘tadigan yuk tashish hajmi ortadi. Tahlilchilarning fikricha, yo‘lak Sharq-G‘arb va Shimol-Janub transport yo‘laklarida muhim bo‘g‘in bo‘lib, barcha mintaqa mamlakatlariga foyda keltiradi va nominal yalpi ichki mahsuloti 1,1 trillion dollar bo‘lgan mintaqaviy iqtisodiyotlarni o‘zida mujassam etgan Yevrosiyo savdo va transport kommunikatsiyalariga hissa qo‘shadi.
Izoh (0)