Amerikaning elektromobil ishlab chiqaruvchi Tesla kompaniyasi kapitallashuvini 2024-yilda 10 milliard dollardan oshirmoqchi.
2023-yilda bu ko‘rsatkich 8,9 milliard dollarni tashkil qilgandi.
“Biz bir vaqtning o‘zida yangi mahsulotlar ishlab chiqarishni ko‘paytirmoqdamiz, uchta qit‘ada ishlab chiqarish zavodlarini qurmoqdamiz va kengaytirmoqdamiz. Shuningdek, yangi akkumulyator texnologiyalarini ishlab chiqmoqdamiz, zaryadlash stansiyalari tarmog‘ini kengaytirmoqdamiz, avtonom va boshqa sun’iy intellekt yechimlariga sarmoya kirityapmiz”, — deyiladi Tesla kompaniyasining hisobotida.
Kompaniya investitsiyalarni sotish hajmining o‘sishi bilan qo‘llab-quvvatlanadigan erkin pul oqimi orqali moliyalash imkoniyatiga ega bo‘lishni rejalashtirmoqda.
“Biz makroiqtisodiy omillar joriy savdo tendentsiyasini qo‘llab-quvvatlaguncha o‘z-o‘zini moliyalash qobiliyatimiz davom etishini kutamiz”, — deyiladi Tesla hisobotida.
O‘tgan hafta kompaniya 2023-yilning to‘rtinchi choragi natijalarini e’lon qildi va joriy yil boshida uning daromadlari o‘sish sur’ati sekinlashgani haqida ma’lum qildi.
Izoh (0)