Bugungi kunda xalqaro moliya institutlari ishtirokidagi loyihalarda qurilishni boshlashgacha bo‘lgan jarayonning o‘zi uzoq vaqt olmoqda. Bu haqda Prezident raisligida o‘tkazilayotgan yig‘ilishda ma’lum qilindi.
Xususan, texnik-iqtisodiy asos (TIA) ishlab chiqishga o‘rtacha bir yil sarflansa, uni xalqaro tashkilotlar talabiga moslashtirish va kelishishga besh-olti oy ketmoqda.
TIAsi ishlab chiqilmagan, aniq hisob-kitobi yo‘q loyihalarga tashqi qarz jalb qilish hanuzgacha davom etmoqda. Loyiha hujjatlari va tender shartlari puxta ishlab chiqilmasligi oqibatida pudratchilarni aniqlash jarayonlari ham cho‘zilmoqda.
Bundan buyon TIAsi tasdiqlanmagan birorta loyihaga qarz jalb qilishga yo‘l qo‘yilmasligi belgilandi. Shuningdek, ishlab chiqilgan TIAni kompleks ekspertiza qiladigan tizim yo‘qligi tanqid qilindi. Endilikda loyihalar TIAsi ham majburiy ekspertizadan o‘tkaziladi.
Umuman, har bir loyiha va mablag‘lar natijadorligi uchun vazirlar shaxsan javobgar ekani belgilandi.
Yig‘ilishda aholi uchun qulay infratuzilma, sifatli taʼlim va tibbiy xizmatlar, yuqori daromadli ish o‘rinlari hamma shaharlarda ham birdek rivojlanmayotgani ko‘rsatib o‘tildi. Mutasaddilar aholi punktlarining bosh rejalari va batafsil rejalashtirish loyihalarini ishlab chiqishni o‘z holiga tashlab qo‘ygani tanqid qilindi.
“Bosh rejasi bor hududlarda ham qurilish ishlari pala-partish tashkil etilmoqda, Qurilish vazirligida buni nazorat qiladigan tizim ishlamayapti”, — dedi davlat rahbari.
Shuningdek, ayrim joylarda noqonuniy qurilishlar aniqlanmoqda. O‘tgan yilning o‘zida 4 mingga yaqin bunday holat aniqlangan. Shuningdek, so‘nggi ikki yilda ko‘p qavatli uylarga tutash maydonlarda 7 mingdan ortiq o‘zboshimcha qurilish bo‘lgan, yana 5 mingta holatda umumiy foydalanishdagi joylarni to‘sib olingan.
Hududlarda, ayniqsa, Toshkent shahrida ko‘p qavatli uylar atrofida noqonuniy avtomobillar uchun to‘xtash joylari qilib, “blokator”lar o‘rnatish avj olmoqda.
Umuman, ko‘chalarning yagona qiyofasiga amal qilish tizimi yo‘qligi, masalan, turli uslubdagi binolar yonma-yon qurilib, shaharlarning arxitektura qiyofasi buzilayotgani qayd etildi.
Avvalroq davlat rahbari yig‘ilishda qurilishlarga ajratilgan budjet mablag‘lari maqsadsiz ishlatilayotgani haqida gapirgani to‘g‘risida xabar berilgandi. Hokim va prokurorlar vaziyatga eʼtiborsizligi qattiq tanqid qilinib, ularning bu boradagi qatʼiy javobgarligi belgilangan.
Izoh (0)