Fransiya prezidenti Emmanuel Makron migrantlarga nisbatan qoidalarni kuchaytiruvchi qonunni imzoladi. Bu haqda Beshinchi respublika rasmiy jurnali xabar qildi.
“Konstitutsiyaviy kengashning 2024-yil 25-yanvardagi qarorini inobatga olgan holda, Respublika prezidenti qonunni e’lon qilmoqda”, — deyiladi hujjat matnida.
25-yanvar kuni Fransiya Konstitutsiyaviy kengashi immigratsiya qoidalarini kuchaytirish haqidagi qonunning ayrim moddalari mamlakatda amaldagi Konstitutsiyaga zid ekanini tan oldi va shu sababli qonun loyihasi matnining uchdan biridan ko‘prog‘i rad etildi.
Loyihadagi oilaviy viza bilan kirish, chet ellik talabalar uchun mamlakatni tark etish, shuningdek, “migratsiya kvotalari”ni joriy etish qoidalarini qat’iylashtiruvchi moddalar qabul qilinmadi.
Kengash mamlakatda noqonuniy bo‘lganlik uchun jinoiy jazo qo‘llash, shuningdek, kasbiy faoliyat turi hamda mamlakatda bo‘lish muddatiga qarab ijtimoiy ta’minot olish huquqidagi farqlarni qonunga zid deb hisobladi. Bundan tashqari, mamlakatda tug‘ilgan har bir chaqaloqqa Fransiya fuqaroligini berish bog‘liq o‘zgarishlar ham ushbu ro‘yxatdan joy olgan.
Fransiyada “Darmanen qonuni” deb ham ataladigan qonun mamlakatda noqonuniy qolgan xorijliklarni chiqarib yuborishni osonlashtiradi. Unda noqonuniy migrantlarni deportatsiya qilish ustidan nazoratni kuchaytirish bo‘yicha ko‘plab chora-tadbirlar mavjud, shuningdek, jinoyat sodir etgan xorijliklarni Fransiyadan chiqarib yuborish taklif etilgan. Ular haqiqatda mamlakatni tark etishlariga ishonch hosil qilish uchun qidiruvdagilar ro‘yxatiga kiritiladi.
Qonun loyihasi migrantlar va xorijlik ishchilar hamda kasaba uyushmalarini himoya qiluvchi fransuz nodavlat tashkilotlari tomonidan tanqid qilingandi.
Izoh (0)