Qahramonimiz Saida Abdumo‘minova Mudofaa vazirligiga qarashli Xizmat itlarini tayyorlash markazidagi yagona ayol kinolog hisoblanadi. Odatda, bu kasbda xotin-qizlar ishlashni unchalik istashmaydi. Chunki bu soha egalaridan nafaqat, jismoniy tayyorgarlik, balki jonivor bilan til topishish ham talab etiladi.
Kichik serjat Saida Abdumo‘minova “Daryo” muxbiri Nargiza Murodova bilan bo‘lgan suhbatda bu sohaga kirib kelishiga nima sabab bo‘lgani haqida so‘zlab berdi.
— Bolaligimdan harbiy ayollar egnidagi formaga havas qilib, shu sohada ishlashni maqsad qilganman. Kollejni tamomlab, Ichki ishlar sohasida ishlash uchun hujjat topshirganman. Ammo ishga qabul qilinmaganman. Undan keyin bor eʼtiborimni sportga qaratib, yengil atletika bo‘yicha sport ustasi bo‘lganman.
2019-yili Jismoniy tarbiya universitetini tamomlash arafasida Mudofaa vazirligi aynan sport sohasidagi qizlarni ishga taklif etayotgani haqidagi xabarni o‘qidim. Bolalikdagi orzumni amalga oshirish uchun suhbatdan o‘tdim va ishga qabul qilindim.
Kinologiya sohasiga kirib kelishim juda qiziq bo‘lgan. Xalqaro armiya o‘yinlarining taqdirlash jarayonlarida kinolog yigitlarning faoliyatini ko‘rib havas qilganman. Ular ham xalqaro armiya o‘yinlarida ishtirok etib, ikki marta chempion bo‘lishgan ekan. Jonivorlarni yaxshi ko‘rganim uchun ulardan yo‘l-yo‘riq o‘rganib kinologiya sohasiga kirib keldim.
Itlar bilan ishlashning o‘ziga yarasha zavqi bor. Ular o‘ziga yaqin olgan insonni yaxshi his qiladi. Biz xizmat itlarini tayyorlashda Ichki ishlar, Bojxona va Chegara qo‘shinlari bilan hamkorlikda ish olib boramiz. Kimgadir yordam kerak bo‘lsa kinolog sodiq do‘sti xizmat iti bilan kerakli manzilga borib, vazifasini sitqidildan ado etadi.
O‘tgan yili Turkiyada bo‘lgan zilzila maydoniga markazimizdan 5 nafar serjat xizmat itlari bilan borib, vayronalar ostidan ko‘plab insonlarni qutqardi. Mutaxassis itlarini tayyorlash markazida ishlayotganimdan faxrlandim. Chunki biz tayyorlayotgan xizmat itlari sodiq askardek xizmat qiladi. Jinoyatchilikning oldini olish yoki falokatlardan keyingi vaziyatni o‘nglashda ularning xizmati juda katta.
Oilaliman, bir nafar qizalog‘im bor. Yashirmayman, kinologiya sohasini tanlashimga ota-onam biroz qarshi bo‘lgan. Sportchi bo‘lganim uchun bu ishni uddalab ketishimga ularni ishontirganman. Ishimiz oson va ayollarga mos deyolmayman.
Xalqaro armiya o‘yinlariga oylab tayyorgarlik ko‘ramiz, ish yuzasidan Respublikaning turli hududlariga boramiz. It bilan har kuni kamida 3-4 soat mashg‘ulotlar o‘tamiz. Ammo inson kasbini va albatta, vatanini sevsa qiyinchiliklar sezilmaydi.
Men kasbimdan faxrlanaman va biz tayyorlayotgan xizmat itlari soha rivojiga o‘z hissasini qo‘shayapti, deb hisoblayman deydi, — Mudofaa vazirligiga qarashli Xizmat itlarini tayyorlash markazi kichik serjanti Saida Abdumo‘minova.
Izoh (0)