Франция президенти Эммануэл Макрон мигрантларга нисбатан қоидаларни кучайтирувчи қонунни имзолади. Бу ҳақда Бешинчи республика расмий журнали хабар қилди.
“Конституциявий кенгашнинг 2024 йил 25 январдаги қарорини инобатга олган ҳолда, Республика президенти қонунни эълон қилмоқда”, — дейилади ҳужжат матнида.
25 январь куни Франция Конституциявий кенгаши иммиграция қоидаларини кучайтириш ҳақидаги қонуннинг айрим моддалари мамлакатда амалдаги Конституцияга зид эканини тан олди ва шу сабабли қонун лойиҳаси матнининг учдан биридан кўпроғи рад этилди.
Лойиҳадаги оилавий виза билан кириш, чет эллик талабалар учун мамлакатни тарк этиш, шунингдек, “миграция квоталари”ни жорий этиш қоидаларини қатъийлаштирувчи моддалар қабул қилинмади.
Кенгаш мамлакатда ноқонуний бўлганлик учун жиноий жазо қўллаш, шунингдек, касбий фаолият тури ҳамда мамлакатда бўлиш муддатига қараб ижтимоий таъминот олиш ҳуқуқидаги фарқларни қонунга зид деб ҳисоблади. Бундан ташқари, мамлакатда туғилган ҳар бир чақалоққа Франция фуқаролигини бериш боғлиқ ўзгаришлар ҳам ушбу рўйхатдан жой олган.
Францияда “Дарманен қонуни” деб ҳам аталадиган қонун мамлакатда ноқонуний қолган хорижликларни чиқариб юборишни осонлаштиради. Унда ноқонуний мигрантларни депортация қилиш устидан назоратни кучайтириш бўйича кўплаб чора-тадбирлар мавжуд, шунингдек, жиноят содир этган хорижликларни Франциядан чиқариб юбориш таклиф этилган. Улар ҳақиқатда мамлакатни тарк этишларига ишонч ҳосил қилиш учун қидирувдагилар рўйхатига киритилади.
Қонун лойиҳаси мигрантлар ва хорижлик ишчилар ҳамда касаба уюшмаларини ҳимоя қилувчи француз нодавлат ташкилотлари томонидан танқид қилинганди.
Изоҳ (0)