Toshkent shahrida faoliyat yurituvchi tuman va shahar hokimlari, shuningdek, Toshkent shahar hokimining 60 ta qarori sudda haqiqiy emas deb topilgan. Bu haqda jurnalist va blogerlar bilan bo‘lib o‘tgan matbuot anjumanida Toshkent shahar Ma’muriy sudi raisi Ulug‘bek Almamedov ma’lum qildi.
Hokimlar qaroridan norozi bo‘lib qilingan murojaatlarga ko‘ra, Toshkent shahar hokimi va tuman hokimlarining qarorlarini haqiqiy emas deb topish bo‘yicha 220 ta ish ko‘rib chiqilgan. Shundan hokimlarning 60 ta qarori haqiqiy emas deb topilgan. 120 tasi talab bo‘yicha rad qilingan, — deydi Ulug‘bek Almamedov.
Sud raisining aniqlashtirishicha, hokimlar chiqargan qarorlarning haqiqiy emas deb topilishi borasida tumanlar kesimida Chilonzor tumani hokimi, umumiy ko‘rsatkich borasida esa Toshkent shahar hokimi yetakchi hisoblanadi.
Jumladan 2023-yil yakunlari bo‘yicha Bektemir, Yunusobod, Yashnobod, Yangihayot, Mirobod hokimlarining bittadan qarori, Mirzo Ulug‘bek va Uchtepa hokimlarining 3 tadan, Shayxontohur hokimining 4 ta, Olmazor hokimining esa 7 ta qarori haqiqiy emas deb topilgan. Bu borada tumanlar bo‘yicha yetakchilik Chilonzor hokimida bo‘lib, o‘tgan yil davomida uning 10 ta qarori haqiqiy emas degan sud qarori qabul qilingan.
Qo‘shimcha qilinishicha, Toshkent shahar hokimi ham sud e’tiroziga sabab bo‘lgan va haqiqiy emas degan tamg‘aga ega 23 ta qaror qabul qilgan.
Izoh (0)