Qashqadaryo viloyatining Koson tumanida rahbarlik qilayotgan Asrol Boyqarayev o‘zi haqida tarqalgan xabarga izoh berib, ro‘zadorlarga majburan suv ichirib, og‘zini ochirganini rad etdi. Bu haqda qashqadaryolik bloger Azizbek Yazdurdiyev xabar tarqatdi.
Ta’kidlanishicha, tuman hokimi bu haqida bugun, jurnalist va blogerlar bilan bo‘lgan navbatdagi muloqotida gapirib bergan.
Matbuot anjumanida so‘z olgan bloger Azizbek Yazdurdiyev Koson hokimi Asrol Boyqarayevga yuzlanib, tarmoqlarda tarqalgan xabar — hokimning ro‘zadorlarga majburan suv ichirib, ro‘zasini ochirgani haqidagi ma’lumotga izoh so‘ragan.
Prokuraturadagilar 110 kishidan ortiq odamni so‘roq qilishdi. Hammasi “hokim mening og‘zimni ochirtirmadi”, degan. Ular o‘ylashdiki, hokim bularga gap o‘rgatib qo‘yadi deb, “melisa” bilan bitta-bitta olib kelib, so‘roq qildi. 110 kishiga 20 minut ichida men qanday o‘rgataman, shunday deb aytinglar deb. Aytolmayman-ku. Hattoki Qur’onga qo‘lini qo‘ydirib, hokim shu ishni qildimi yoki qilmadimi deb so‘rashdi. Qilmadi, deyishdi, — deydi Asrol Boyqarayev savolga javob berar ekan.
Bunga qadar ham ijtimoiy tarmoqlarda Asrol Boyqarayev bilan bog‘liq ko‘plab ma’lumotlar tarqalgandi.
2021-yilda uning xizmat avtomobili tuman markazida bir fuqaroni urib yuborgani, oqibatda fuqaro vafot etgani xabar berildi. So‘ngra mazkur YTHga hokimning birinchi o‘rinbosarini olib yuruvchi haydovchi aybdor ekani, YTH sodir bo‘lgan paytda avtomobilda hokim bo‘lmagani ma’lum qilindi. Avvalroq esa Asrol Boyqarayevning qamoqqa olingani yozib chiqildi.
Bunga munosabat bildirgan hokimlik axborot xizmati “tasdiqlanmagan, vahima va shov-shuv uchun tarqatilayotgan yolg‘on xabarlarga ishonmang”, dedi. Birozdan so‘ng Telegram’dagi kanallarning birida Koson tumani hokimi Asrol Boyqarayevning matbuot kotibiga o‘zini tez-tez yoritib turishini so‘ragani, oxirgi marotaba uni matbuot kotibi qutqarib qolgani aytilgan xabar tarqaldi. Koson hokimi matbuot kotibi Dilshod Nabiyev esa mazkur xabarni ham rad etdi.
Izoh (0)