Сурхондарё вилояти Термиз туманида раҳбар қарзларни тўламаслик учун ўз корхонасини банкротликка олиб келди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Унга кўра, ҳолат Бош прокуратура ҳузуридаги департаментнинг Сурхондарё вилояти бошқармаси томонидан ўтказилган терговга қадар текширувда аниқланган. “П.Т.” МЧЖ раҳбари А.Т. ва бошқалар МЧЖнинг 841,8 миллион сўм дебиторлик қарздорлиги мавжуд бўлса-да, МЧЖни тўловга қобилиятсиз деб топиш ва тугатишга доир иш юритиш жараёнида ушбу маълумотларни яширган. Термиз туманлараро Иқтисодий судининг тугатиш тўғрисидаги ажримига асосан 369,9 миллион сўм солиқ қарзини ҳисобдан чиқариб, солиқ ва бошқа мажбурий йиғимларни тўлашдан бўйин товлаб, МЧЖни қасддан тўловга қобилиятсизлигига (банкротликка) олиб келганликлари аниқланган.
Мазкур ҳолат юзасидан Жиноят кодексининг 184-моддаси (солиқлар ёки йиғимларни тўлашдан бўйин товлаш) ва 181-1-моддаси (қасддан банкротликка олиб келиш) билан жиноят иши қўзғатилиб, тергов ҳаракатлари ўтказилмоқда.
Изоҳ (0)