Buxoro, Qashqadaryo va Surxondaryo viloyatlarida kredit mablag‘larini talon-toroj qilish holatlari aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Qorako‘l tuman bo‘limi tomonidan AT “Xalq banki” Buxoro viloyat filialining murojaatiga asosan tergovga qadar tekshiruv o‘tkazilgan. Tekshiruvda “G.Ch.” fermer xo‘jaligi masʼul shaxslari va boshqalar chorvachilikni rivojlantirish uchun ajratilgan 423 560 dollar miqdoridagi kreditni soxta hujjatlarni rasmiylashtirish orqali garov taʼminotisiz qoldirib, ushbu mablag‘larni o‘zlashtirish yo‘li bilan talon-toroj qilgani aniqlangan.
Shu kabi, departamentning Shahrisabz shahar bo‘limi tomonidan o‘tkazilgan tergovga qadar tekshiruvda “K.T.” MCHJ rahbari S.Q. va boshqalar o‘zaro til biriktirib, 10 nafar fuqaroga issiqxona qurish va tikuvchilik faoliyatini yo‘lga qo‘yish uchun ajratilgan 457 million so‘m kreditni rasmiy hujjatlarga soxta maʼlumotlar kiritish orqali o‘zlashtirish yo‘li bilan talon-toroj qilganliklari aniqlangan.
Departamentning Oltinsoy tuman bo‘limi tomonidan o‘tkazilgan tergovga qadar tekshiruvda esa tumandagi “Q.” MFY bo‘yicha sobiq hokim yordamchisi Q.N. 7 nafar fuqaroga issiqxona qurish uchun ajratilgan 215,4 million so‘m imtiyozli kreditni o‘zi norasmiy boshqarib kelayotgan “O.C.” va “B.T.” MCHJlarning hisob raqamlariga o‘tkazib o‘zlashtirish va rastrata qilish yo‘li bilan talon-toroj qilgani aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Surxondaryo viloyatining Oltinsoy va Termiz tumanlarida 11 milliard so‘mdan ortiq kredit mablag‘larini o‘zlashtirgan MCHJ rahbarlari aniqlangandi. Shuningdek, Surxondaryo va Farg‘onada oilaviy korxonalar rahbarlari 1,2 milliard so‘mdan ortiq imtiyozli kreditlarni talon-toroj qilgani to‘g‘risida xabar berilgan edi.
Izoh (0)