O‘zbekiston tashqi ishlar vazirining birinchi o‘rinbosari Bahromjon A’loyev boshchiligidagi delegatsiya Ugandaning Kampala shahrida bo‘lib o‘tgan Qo‘shilmaslik harakatining 19-sammitida ishtirok etdi. Bu haqda TIV matbuot xizmati xabar berdi.
Qayd etilishicha, tadbirda 100 dan ortiq davlat delegatsiyalari, jumladan, davlat, hukumat, tashqi ishlar idoralari rahbarlari va ularning o‘rinbosarlari ishtirok etgan.
Uchrashuvda xalqaro kun tartibidagi dolzarb masalalar yuzasidan fikr almashilgan, shuningdek, global miqyosda tinchlik va barqarorlik hamda ijtimoiy-iqtisodiy taraqqiyotni ta’minlashda harakatning mavjud salohiyatidan foydalanish bo‘yicha takliflar ko‘rib chiqilgan.
O‘zbekiston delegatsiyasi 2027-2029-yillarda Qo‘shilmaslik harakati raisligiga O‘zbekiston nomzodini qo‘llab-quvvatlaganliklari uchun harakatning barcha a’zolariga minnatdorlik bildirib, ishtirokchilarni O‘zbekistonda jamiyatning barcha sohalarida amalga oshirilayotgan keng ko‘lamli va jadal islohotlarning asosiy yo‘nalishlari haqida ma’lumot bergan.
“Transport-logistika sohasidagi hamkorlikni rivojlantirish, iqtisodiy va moliyaviy tizimlarni takomillashtirish, iqlim o‘zgarishiga qarshi kurashish va atrof-muhitni muhofaza qilish muhimligiga alohida e’tibor qaratildi. Ilm-fan va innovatsion texnologiyalar sohasida o‘zaro hamkorlik va tajriba almashishni kuchaytirish, yosh avlodni qo‘llab-quvvatlash zarurligi qayd etildi”, — deyiladi xabarda.
Eslatib o‘tamiz, 2023-yil mart boshlarida Shavkat Mirziyoyev Qo‘shilmaslik harakatining maxsus monitoring va ilmiy tadqiqot tarmog‘ini tashkil qilishni taklif qilgandi. “Albatta, bunday qiyin va murakkab sinovlarni faqatgina birgalikda, bir-birimizni yaqindan qo‘llab-quvvatlagan holda yenga olamiz. Shu maʼnoda, O‘zbekiston 2030-yilga qadar mo‘ljallangan Senday hadli dasturining asosiy maqsadlariga erishish bo‘yicha global platforma faoliyatini yanada kuchaytirish tarafdoridir”, — degandi prezident.
Izoh (0)