Афғонистонда ҳалокатга учраган Falcon 10 бизнес-жети учувчиси Аркадий Грачев ва унинг рафиқасига айблов эълон қилинди. Уларни 10 йилгача қамоқ жазоси кутмоқда. Бу ҳақда Mash Telegram канали хабар берди.
Маълум бўлишича, ҳалокатга учраган самолётга эгалик қилган “Атлетик групп” учувчининг рафиқаси Екатерина Агаповага тегишли. Бироқ компания ҳеч қачон йўловчи ташиш билан шуғулланмаган ва лицензияга эга бўлмаган. Самолёт “Атлетик групп” компаниясига тегишли, бироқ парвозлар бошқа компания — “Жет Аэро” орқали амалга оширилган.
“Аркадий Грачев ва унинг рафиқаси 10 йилгача қамоқ жазосига ҳукм қилиниши мумкин”, — дейилади хабарда.
Авиаҳалокатнинг эҳтимолий сабаблари қаторидан самолёт бортида ёнилғи етишмаслиги, кучли шамол ва қор бўрони жой олган. Ёнилғи қуйиш вақтида уни ҳисоблашда хатолар бўлгани айтилмоқда.
“Авиаҳалокатнинг турли хил версиялари кўриб чиқилмоқда, устуворликлардан бири двигателнинг ишдан чиқиши кўринишидаги техник сабаблардир”, — дейди Россия Тергов қўмитаси.
Бортда тиббий гуруҳ, икки учувчи, тадбиркор Анатолий ва Анна Евсюковлар бўлган. Улар Таиланддан қайтиш учун Falcon-10 самолётини ижарага олган, сабаби Аннада номаълум инфекция аниқланган. Авиатехника Гайа—Тошкент—Москва йўналишида ҳаракатланиши керак эди.
Falcon-10 бизнес-жети 21 январь куни Афғонистон тоғларида ҳалокатга учраган. Оқибатда бортда бўлган Анатолий ва Анна Евсюковлар ҳалок бўлган. Афғонистонлик қутқарувчилар тўрт кишини тирик топган. Омон қолганлар Кобулдаги ҳарбий тиббиёт мажмуасига етказилган.
Изоҳ (0)