Rossiyaning Irkutsk viloyatida 14 yashar qizning qo‘lida telefon zaryadlovchi qurilma portlab ketdi. Qiz ikki qo‘lidan bilagigacha ayrilgan, deb yozadi “112” Telegram kanali.
Xabarga ko‘ra, qiz telefoni quvvatlanayotgan vaqtda onlayn o‘yin o‘ynagan. Bu vaqtda onasi uch farzandi bilan televizor ko‘rayotgan, otasi esa uy yumushlari bilan shug‘ullanayotgan. Portlashdan keyin butun oila oshxonaga yugurib kirib, polda qonga belanib yotgan qizni ko‘rgan.
Qizning boshi, ko‘krak qafasi, qorni va oyoqlari ham jarohatlangani aytilmoqda. Jabrlanuvchining onasi tez yordam chaqirgan. Qiz zudlik bilan operatsiya qilingan, shifokorlar uning tanasidan quvvatlagichning plastik siniqlarini olib tashlagan.
Dastlabki ma’lumotlarga ko‘ra, portlash qiz elektr tarmog‘idan quvvatlagichni uzmoqchi bo‘lganida sodir bo‘lgan, shu paytda qisqa tutashuv kuzatilgan. Holat yuzasidan tergovchilar jinoiy ish qo‘zg‘atgan. Federal xavfsizlik xizmati tergovga qo‘shilgan va voqeada kutilmagan burilish paydo bo‘lgan.
Gap shundaki, mutaxassislar qizning ota-onasi tomonidan aytilgan ayblovni haqiqat deb hisoblamaydi. Ularning fikriga ko‘ra, portlash aslida bunday jiddiy jarohatlar uchun ancha kuchlilik qiladi. Ikkinchidan, xonadagi to‘rtta deraza ham sinib ketgan va mebellar shikastlangan. Gaz pechining portlashi mumkinligi haqidagi versiya mavjud edi. Aslida nima bo‘lganini tergov aniqlaydi.
Izoh (0)