Қозоғистонда таваллудига 80 йил тўладиган Олмаота шаҳрининг собиқ ҳокими, сиёсатчи Заманбек Нурқадиловга ҳайкал ўрнатилади. Бу ҳақда унинг қизи Қуралай Нурқодилова маълум қилди, деб ёзмоқда “Орда.кз”.
Ёдгорлик Нурқадилов туғилиб ўсган Кеген қишлоғида (Олмаота вилояти) ўрнатилиши кутилмоқда. Бундан ташқари, мактабга унинг номи берилади, сиёсатчи Олмаотада яшаган уйга ёдгорлик лавҳаси осилади. Президент Қосим-Жўмарт Тўқаев имзолаган тегишли мактубни унинг матбуот котиби Берик Уали Нурқадилов шарафига ташкил этилган хотира зиёфатида ўқиб эшиттирди.
“Заманбек Калабаевич истиқлол тонгида кўплаб масъулиятли вазифаларни бажарган фуқаро. Унинг мустақилликни қарор топтириш, ҳудудлар равнақига қўшган салмоқли ҳиссасини инкор этиб бўлмайди. Халқ ўғлонлари номларини улуғлаш ва уларнинг меҳнатига муносиб баҳо бериш авлодларнинг бурчидир”, — дея давлат раҳбарининг сўзларидан иқтибос келтирган Қозоғистон ОАВ.
Мухолифатчи оиласига мактубларни Сенат раиси Маулен Ашимбаев, парламент раиси Эрлан Кошанов, Олмаота ҳокими Эрболат Досаев ва Олмаота вилояти ҳокими Марат Султонгазиев юборган.
Замонбек Нурқадилов Олмаота шаҳрининг биринчи ҳокими бўлган, Фавқулодда вазиятлар вазири лавозимида ишлаган ва биринчи президент Нурсултон Назарбоевнинг энг яқин сафдошларидан бири ҳисобланган. Бироқ 2004 йилнинг март ойида у кутилмаганда ҳокимиятга қарши чиқди, давлат раҳбари сиёсатини кескин қоралади ва вазирлик лавозимидан четлаштирилди. Шундан сўнг у мамлакат раҳбариятининг ва шахсан Назарбоевнинг муросасиз танқидчисига айланди.
“Коммерсант” газетасининг ёзишича, Нурқодилов Қозоғистонда Коррупция бўйича халқаро тергов бюросини ташкил қилган ва қўлида президент Назарбоев ва унинг кўплаб шериклари томонидан содир этилган коррупция жиноятлари ҳақида далиллар борлигини бир неча бор таъкидлаган. У мазкур айбловчи далилларни хориж банкларининг сейфларида сақлаганини айтиб, вақти келганда оммага эълон қилишга ваъда берган.
2005 йил 12 ноябрда Нурқодилов Олмаотадаги уйида ўлик ҳолда топилди, унга учта ўқ – бири бошига, иккитаси кўкрагига теккан эди. Унинг ўлими расмий сабаби ўз жонига қасд қилиш деб айтилди. Сиёсатчининг шериклари қотилликни даъво қилишди. Иш 2006 йилнинг ноябрида ёпилди.
Замонбек Нурқадиловга ҳайкал ўрнатилиши ҳақидаги хабар Остонадаги Нурсултон Назарбоев ҳайкали демонтаж қилинганидан бир неча кун ўтиб пайдо бўлди. Биринчи президент ҳайкали Миллий мудофаа университети ҳудудидан олиб ташланди. Ҳозирда ҳайкал Мудофаа вазирлиги биноларидан бирида сақланмоқда, келажакда уни Қозоғистон Республикаси Қуролли Кучлари Давлат ҳарбий тарихи музейи биносига кўчириш режалаштирилган.
Изоҳ (0)