O‘zbekistonda o‘tgan yilda inflyatsiya 9 foizdan pasaydi. Bu haqda Shavkat Mirziyoyev videoselektor yig‘ilishida ma’lum qildi, deb xabar beradi prezident matbuot kotibi.
Yig‘ilishda ko‘plab masalalar narx-navo oshib, odamlar norozi bo‘lganidan so‘ng, “qo‘l boshqaruvi” bilan hal bo‘layotgani qayd etilgan. Masalan, narx qimmatlagani uchun 61 turdagi isteʼmol mahsulotlariga nisbatan bojxona bojlari bekor qilingan.
Lekin joylardagi iqtisod bo‘yicha hokim o‘rinbosarlari, viloyat va tumanlardagi iqtisodiyot bo‘limlari rahbarlari ushbu mahsulotlarni o‘zimizda ko‘paytirish orqali inflyatsiyani jilovlashni o‘ylamayotgani tanqid qilindi.
Farg‘ona, Jomboy, Ellikqalʼa, Parkent tumanlari va Yangiyo‘l shahrida mol go‘shti, Konimex, Oltinko‘l, Bo‘ston tumanlari va Zarafshon shahrida tuxum narxi oshganiga ushbu hududlar rahbarlari xotirjam qarab o‘tirgani qayd etildi.
Bosh vazirga ushbu tuman-shahar hokimlari va sektor rahbarlarining lavozimiga loyiqligini ko‘rib chiqish topshirildi.
Bundan oldin prezident bosh vazirga yil davomida auksionga umuman yer chiqarmagan Baliqchi, Jalaquduq, Bektemir, Mirobod, Olmazor, Chilonzor, Yunusobod, Yakkasaroy tumanlari hokimlarining lavozimiga loyiqligini hal qilishni topshirgani to‘g‘risida xabar berilgandi.
Izoh (0)