Rossiyada o‘zbekistonlik erkak konsullik binosidan o‘z o‘g‘lini o‘g‘irlab ketdi. Bu haqda 78.ru xabar berdi.
Xabarga ko‘ra, 10-yanvar kuni Sankt-Peterburg politsiyasiga bolaning onasi — 23 yoshli ayol murojaat qilgan. U uch oylik o‘g‘li Krasnoarmeyskaya ko‘chasi, 4-uyda joylashgan O‘zbekiston Bosh konsulligi binosidan o‘g‘irlab ketilganini aytgan. Bolaning biologik otasi buni ayolga bildirmasdan qilgani ta’kidlanadi.
Politsiya xodimlari zudlik bilan 21 yoshli gumonlanuvchini Pushkin shahrining Sapyornaya ko‘chasidagi uylardan biridagi xonadondan topib, qo‘lga olgan. U qo‘shimcha tergov o‘tkazish uchun bo‘limga olib ketilgan, chaqaloq esa onasiga topshirilgan.
Holat yuzasidan jinoiy ish ochilgan. Mazkur fakt yuzasidan surishtiruv ishlari olib borilmoqda, hodisaning barcha holatlari aniqlanmoqda.
Izoh (0)