Rossiya prezidenti Vladimir Putin 11-yanvarda qachondir Kuril orollariga tashrif buyurishga va’da berdi. Rossiya prezidenti hech qachon Kuril orollarida bo‘lmaganini aytdi.
Shundan so‘ng Yaponiya vaziyatni kuzatib borishini va kerak bo‘lsa, javob qaytarishini ma’lum qildi. Bu haqda Yaponiya Vazirlar mahkamasi bosh kotibi Yosimasa Xayasi ma’lum qildi.
“Rossiya hukumati vakillarining har bir bayonotiga izoh berishdan tiyilaman. Biroq hukumat vaziyatni kuzatib boradi va shunga yarasha javob qaytaradi”, — dedi u.
Xayasi Yaponiyaning Rossiyaga nisbatan pozitsiyasini takrorlab, Tokio Moskvaga qarshi sanksiyalarni saqlab qolishini va Kiyevni qo‘llab-quvvatlashda davom etishini aytdi.
Kuril orollari Rossiya va Yaponiya o‘rtasidagi bahsli mavzu. Ikkala davlat ham mazkur hududga da’vo qiladi. Ikkinchi jahon urushidan keyin Moskva va Tokio tinchlik bitimini ishlab chiqish bo‘yicha muzokaralar olib bordi. Bunga asosiy to‘siq Kuril orollarining janubiy qismiga bo‘lgan huquq bo‘yicha kelishmovchiliklar sabab bo‘lmoqda.
Izoh (0)