Xitoy rahbari Si Szinpin Rossiya prezidenti Vladimir Putin bilan muzokaralar chog‘ida Yaponiyaning Kuril orollariga da’volarini qo‘llab-quvvatlamadi. Bu haqda Yaponiyaning Kyodo axborot agentligi Xitoydagi manbasiga tayanib xabar berdi.
Mart oyida Moskvada bo‘lib o‘tgan muzokaralar chog‘ida Si Szinpin Putinga Xitoy hududiy bahsda “hech qaysi tomonda bo‘lmasligini” aytgan, dedi manba. Shu tariqa, manbaning qayd etishicha, Xitoy bu masalada neytral pozitsiyani egallagan.
So‘nggi o‘n yilliklarda Xitoy to‘rtta bahsli orol Yaponiyaga tegishli degan pozitsiyani egallab kelayotgan edi. 1964-yilda XXR rahbari Mao Szedun Xitoy Yaponiyaning hududiy da’volarini qo‘llab-quvvatlashini va Rossiya Kuril orollarini qaytarib berishi kerak deb hisoblashini e’lon qilgan. Xitoy hukumati so‘nggi yillarda bu haqda ommaviy ravishda aytilmagan bo‘lsa-da, ushbu pozitsiyani saqlab qolgandi. Xitoydagi xaritalarda bahsli orollar “Rossiya tomonidan bosib olingan” deb ko‘rsatilgandi, deb yozadi Kyodo.
Agentlik suhbatdoshlarining qo‘shimcha qilishicha, Xitoyning Kuril orollari bo‘yicha o‘z pozitsiyasini o‘zgartirish haqidagi qarori nizoni hal qilishni murakkablashtirishi mumkin, chunki Rossiya Xitoy ko‘magida “hozir bu masalada yon berishi dargumon”.
Ikkinchi jahon urushidan keyin SSSR Kuril orollarini anneksiya qilib oldi. 1956-yilda Sovet Ittifoqi Yaponiya bilan tinchlik deklaratsiyasini imzoladi va tomonlar tinchlik shartnomasini tuzgandan so‘ng Shikotan va Xabomay orollarini qaytarishga va’da berdi. Keyinchalik, Yaponiya hukumati barcha orollarni qaytarishni talab qila boshladi, tinchlik shartnomasi esa imzolanmay qoldi.
Rossiyaning Ukrainaga keng miqyosli bosqinidan ko‘p o‘tmay, 2022-yil mart oyida Rossiya hukumati G‘arb sanksiyalariga qo‘shilgan Yaponiya bilan tinchlik shartnomasi bo‘yicha muzokaralarni to‘xtatdi. Oradan bir oy o‘tib, aprelda Yaponiya Tashqi ishlar vazirligi 2003-yildan beri ilk bor Kuril orollarini “noqonuniy bosib olingan” hudud deb atadi.
Izoh (0)