“O‘zgidromet” hafta davomida qanday ob-havo kutilayotganini ma’lum qildi

“O‘zgidromet” 8—12-yanvar kunlari qanday ob-havo kutilayotgani haqida ma’lumot berdi.

Unga ko‘ra, 8-yanvar kuni Toshkent, Qashqadaryo, Surxondaryo viloyatlarida harorat kunduzi 7-12 daraja iliqdan yuqori bo‘lmaydi.

9—10-yanvar kunlari O‘zbekistonga Turkmaniston hududlaridan iliq havo massasi kirib kelishi kutilmoqda. Ushbu kunlarda yog‘ingarchilik kutilmaydi, harorat ko‘tariladi. 9-yanvarda kechasi 0-5 daraja iliq, kunduzi 12-15 daraja iliq bo‘ladi, 10-yanvarda harorat kechasi 5-8 daraja iliqqacha, kunduzi 15-18 daraja iliqqacha, janubiy hududlarda 20 daraja iliqqacha ko‘tariladi. Kechasi va ertalab respublika bo‘yicha tuman tushadi.

11-yanvarda Kaspiy dengizi hududlaridan nam va salqin havo kirib kelishi kutilmoqda. Respublika bo‘yicha ba’zi joylarda yomg‘ir yog‘adi, shimolda yog‘ingarchilik (yomg‘ir, qor) bo‘ladi. Havo harorati kechasi 5-10 daraja iliq, kunduzi 10-15 daraja iliqni tashkil etadi, shimolda kechasi 3-8 daraja sovuqqacha, kunduzi 0-5 daraja iliqqacha pasayadi.

Toshkentda 8-yanvar kuni yomg‘ir yog‘adi, kunduzi yog‘ingarchilik kutilmaydi. G‘arbiy shamol yo‘nalishini o‘zgartirib, sharqdan 5-10 m/s tezlikda esadi. Harorat 9-11 daraja iliq bo‘ladi.

9—10-yanvarda yog‘ingarchilik kutilmaydi. Sharqiy yo‘nalishdagi shamol 3-8 metr/sekund tezlikda esadi. 9-yanvarda kechasi va ertalab tuman tushishi mumkin. Harorat 9-yanvarda kechasi 0-2 daraja iliq, kunduzi 12-14 daraja iliq bo‘ladi, 10-yanvarda harorat kechasi 5-7 daraja iliqqacha, kunduzi 16-18 daraja iliqqacha ko‘tarilishi kutilmoqda.

11-yanvarda yomg‘ir yog‘ishi mumkin. Sharqiy shamol yo‘nalishini o‘zgartirib, g‘arbdan 5-10 metr/sekund tezlikda esadi. Harorat kechasi 7-9 daraja iliq, kunduzi 10-12 daraja iliq bo‘ladi.