Jidda shahrida O‘zbekiston delegatsiyasi va Saudiya Arabistoni podshohligi Haj va umra vazirligi rahbariyati o‘rtasida uchrashuv bo‘lib o‘tdi. Bu haqda Musulmonlar idorasi matbuot xizmati xabar berdi.
Qayd etilishicha, muloqotda Haj va umra vaziri Tavfiq bin Favzon ar-Rabia, Din ishlari bo‘yicha qo‘mita raisi Sodiqjon Toshboyev hamda O‘zbekiston musulmonlari idorasi raisi, muftiy Nuriddin Xoliqnazar hazratlari ishtirokida o‘zaro aloqalarning istiqbollari hamda “Haj—2024” mavsumini yuqori darajada tashkil etish masalalari muhokama etilgan.
Uchrashuvda Haj va umra vaziri so‘nggi yillarda O‘zbekiston eng yaxshi natijalarga erishayotgani va jadal taraqqiy etayotganini taʼkidlash barobarida avvalgi yildagi O‘zbekiston zaminiga tashrifi bir umr yodida qolganini bildirgan.
“Uchrashuvda O‘zbekiston delegatsiyasi Haj va umra ziyoratchilariga xizmat ko‘rsatish sifatini yanada oshirish borasida o‘z fikr-mulohazalarni taqdim etdilar”, — deyiladi xabarda.
Muloqot yakunida Din ishlari bo‘yicha qo‘mita hamda Haj va umra vazirligi o‘rtasida muborak safarlarni yanada yaxshilash yuzasidan kelishuv imzolangan.
O‘zbekiston fuqarolari uchun haj kvotasi
2023-yilda O‘zbekiston fuqarolari uchun umumiy haj kvotasi 15 ming nafar etib belgilandi. Bu yilgi haj mavsumi uchun kvota 12 mingdan 15 ming nafarga oshirilgani qayd etildi. Keyingi yillarda mamlakatdan haj safariga boruvchilar sonini bosqichma-bosqich oshirib borish rejalashtirilgan. Har bir ziyoratchiga to‘lov miqdori jamoatchilik kengashi qaroriga asosan 68 million 760 ming so‘m etib belgilagan edi.
Izoh (0)