Kongress qarorisiz Ukrainaga boshqa qurol berilmaydi — Oq uy

AQSH Kongressi prezident Jo Baydenning qo‘shimcha moliyalashtirish haqidagi iltimosini ma’qullamaguncha, Vashington Kiyevga yordam bera olmaydi. Bu haqda Oq uy Milliy xavfsizlik kengashi koordinatori Jon Kirbi ma’lum qildi.

Kirbining so‘zlariga ko‘ra, AQSH maʼmuriyati ukrainaliklar zarur qurol-yarog‘larni olishi uchun barcha imkoniyatlarni ishga soladi.

“Ular (qurol ta’minoti — “Daryo” tahriri) to‘xtashga majbur bo‘ladi. Prezident vakolatiga ega bo‘lgan so‘nggi xavfsizlik paketini imzoladi. Hammasi shu. Ukrainaga qo‘shimcha yordam ko‘rsatish uchun qo‘shimcha qonunchilik kerak”, — deya tushuntirdi u.

Shuningdek, Kirbi AQSH dekabr oyi oxirida e’lon qilgan so‘nggi paket Ukrainaga yaqin haftalarda yetib kelishi kerakligini ta’kidladi.

“Ammo bundan keyin qo‘shimcha mablag‘ yo‘qligi sababli biror narsa olish mumkin bo‘lgan sehrli qozon yo‘q”, — dedi Kirbi.