Ўзбекистондаги туман (шаҳар) ички ишлар органлари навбатчилик қисмлари 2024—2025 йилларда босқичма-босқич алкотестерлар билан таъминланади. Бу ҳақда Вазирлар Маҳкамасининг “Ички ишлар органларининг навбатчилик қисмларида алкотестер ёрдамида шахсларнинг алкоголдан мастлик ҳолатида эканлигини текшириш тартиби тўғрисидаги низомни тасдиқлаш ҳақида”ги қарори лойиҳасида кўзда тутилган.
Мазкур лойиҳа Президент администрацияси топшириғи ижросини таъминлаш мақсадида Ички ишлар вазирлиги томонидан ишлаб чиқилган.
Ҳужжатда қайд этилишича, ҳозирги кунда ички ишлар органларига маъмурий ҳуқуқбузарлик содир этганликда гумон қилиниб олиб келинган шахсларнинг мастлик ҳолатини текшириш учун уларни тиббиёт муассасаларига олиб бориб текширувдан ўтказиш ички ишлар ходимлари олдига қўйилган вазифаларни тезкор билан ҳал қилишда қийинчиликлар туғдирмоқда.
Шу билан бирга, ички ишлар органларининг навбатчилик қисмларида шахсларнинг мастлик ҳолатини текшириш замонавий ва вақтни тежайдиган мосламаларни қўллашни ташкил этиш, хусусан, алкотестерлардан фойдаланиш заруратини юзага келтирмоқда.
Маъмурий жавобгарлик тўғрисидаги кодексининг 32-моддаси 6-бандига асосан жавобгарликни оғирлаштирувчи ҳолат этиб белгиланган ҳуқуқбузарликнинг маст ҳолда содир этилганлигини аниқлаш зарурияти мавжуд. Бу эса, ўз навбатида, маъмурий ҳуқуқбузарлик содир этганликда гумон қилиниб олиб келинган шахсларни тезкорлик билан мастлик ҳолатини текширишни талаб этади.
Мазкур йўналишдаги халқаро тажриба ўрганилганида айрим давлатлар (Россия, АҚШ, Канада, Франция, Қозоғистон, Буюк Британия, Туркия ва Жанубий Корея)да махсус мосламалар (алкотестер)дан фақатгина йўл-патрул хизмати ходимлари ва тиббиёт муассасаларида фойдаланилиши, бошқа ички ишлар ходимлари томонидан фойдаланиш тартиби ишлаб чиқилмагани маълум бўлди.
Лойиҳанинг қабул қилиниши маъмурий ҳуқуқбузарлик содир этганликда гумон қилиниб ички ишлар органларига олиб келинган шахсларнинг алкоголдан мастлик ҳолатини алкотестер ёрдамида тезкорлик билан текшириш имкониятини яратади.
Қарор лойиҳасининг қабул қилиниши бошқа норматив-ҳуқуқий ҳужжатларга ўзгартириш ва қўшимчалар киритиш заруратини келтириб чиқармайди.
Лойиҳани амалга ошириш учун 2024—2025 йиллар давомида босқичма-босқич жами 208 дона алкотестер қурилмаларини Қорақалпоғистон Республикаси ИИВ, Тошкент шаҳар ва Тошкент вилояти ИИББ ҳамда вилоятлар ИИБнинг ҳуқуқбузарликлар профилактикаси тизимини ривожлантириш жамғармалари ҳисобидан олиниши режалаштирилмоқда.
Изоҳ (0)