O‘zbekistonda har yili qator amaldorlar tomonidan aytilib, “mashhur” bo‘ladigan iboralar uchrab turadi. Yakuniga yetgan 2023-yilda ham ayrim mansabdorlar aytgan gaplar omma orasida muhokamalarga sabab bo‘ldi. “Daryo” ulardan baʼzilarini eslatadi.
“Avtomobillarga navbat yo‘q bo‘ladi...”
Fevral oyida sobiq “O‘zavtosanoat” raisi (23-martdan Toshkent shahar hokimi) Shavkat Umrzoqov Asaka shahrida o‘tkazilgan Chevrolet Onix taqdimotida ozgina sabr qilinsa, avtomobillarga navbat yo‘q bo‘lishini aytgandi.
“Andijonning o‘zida bu yil 250−300 mln dollarlik to‘rtta yangi zavod quradigan bo‘ldik. Bu nima beradi? Tasavvur qiling, 2016-yil 80 ming mashina chiqqan, 2017-yil 120 ming chiqqan. Bugun 330 ming chiqaryapmiz. Bu yil 400 mingdan oshiq chiqaramiz. Navbat yo‘q bo‘ladi, ishoning, faqat ozgina sabr (qiling) ”, — degan u.
Uzoq yillik navbatlardan charchagan, ommabop modeldagi avtomobillarni zavoddan shartnoma asosida sotib olishi orzu bo‘lib qolayotgan odamlar bunday gapni ozroq umid, ko‘proq ishonchsizlik bilan qarshi oldi. Bu gaplar aytilgan paytda sobiq “O‘zavtosanoat” raisiga 2022-yil 1-maygacha avtomobillarga navbatni yo‘qotish topshirig‘i berilgandi. Navbatlar haligacha yo‘qolmadi. Umrzoqov esa hozirda Toshkent shahar hokimi.
Vazirdan shedevr
Shubhasiz, fevral oyida jamotchilik uchun kutilmagan chiqishlardan biri sog‘liqni saqlash vaziri Amrillo Inoyatovning Farg‘onada tibbiyot sohasi vakillari va jurnalist bilan uchrashuvida sodir bo‘ldi.
Tadbirda Inoyatov sog‘liqni saqlash tizimidagi rahbar xodimlarning maoshi haqida gapirib, rahbar-shifokorlardan biridan oyligi qanchaligini so‘ragan. Vazir shifokorning gapini eshitib, u aytgan 5,5 million so‘m oyligi va unga qo‘shimcha bemorlar beradigan haqni qo‘shganda yetarlicha summa chiqishiga ishonch bildirgan.
“Bemorni mehr bilan davolasangiz, so‘ramasangiz ham o‘zi rozi bo‘lib sizga barakasini berib ketadi. Ochiq aytyapman. Yetmaydimi, degan savolni o‘zimizga o‘zimiz berishimiz kerak”, — degan vazir jurnalist savoliga javoban.
Antikorrupsiya agentligi vazirning gapariga munosabat bildirib, shifokorlarni rag‘batlantirish yo‘llaridan biri sifatida bemorlar bergan mablag‘ning eʼtirof etilishini qonunchilikka va mamlakatda olib borilayotgan korrupsiyaga qarshi kurashish siyosatiga zid harakat sifatida qayd etgan. Mazkur taklif tizimda korrupsiyaviy jinoyatlar sonining ortishiga hamda shifokor kasbi mavqeining pasayishiga, sog‘liqni saqlash tizimiga xalqning ishonchi kamayishiga sabab bo‘lishi mumkinligi taʼkidlangan.
“Shunaqayam jinni bo‘lasanmi? ”
2023-yil iyunda prezident maslahatchisi o‘rinbosari Shuhrat G‘aniyev tomonidan o‘tkazilgan selektor yig‘ilishida g‘alladan bo‘shagan yerlar haqidagi maʼlumotlarni qo‘shib yozgan masʼullar haqorat qilingan video tarqalgan.
“Nomard, shunchalik ham aldaysanmi? Xatirchida hali 5 ming gektar g‘alla o‘rilgani yo‘q. Jinniku bu. Jinni bo‘lsang, sal bir qonuniyroq, fahm-farosati ishlaydigan jinni bo‘l. Shunaqayam jinni bo‘lasanmi? Jinnining jinnisi ekansanku”, — deya “qo‘shib yozish”da ayblangan mansabdorlarni haqoratlagan Shuhrat G‘aniyev.
Umuman olganda, Shuhrat G‘aniyev Farg‘ona viloyati hokimi lavozimida ishlagan paytlarda ommaga “so‘kong‘ich hokim” sifatida tanilgan. Uning 2018-yildagi yig‘ilishda toshloqliklarni haqoratlagani aytilgan audosi tarqalgandi. 2019-yilda esa soqol, ro‘mol va ish joylarida namozga qarshi chiqib, bunga bo‘ysunmaganlarni qamash bilan tahdid qilgani yozilgan audio tarqalgandi. Bu masala Senatda ko‘rilgan va sobiq hokim “o‘tinib-o‘tinib” kechirim so‘ragandi.
“Sanʼat — chegarasiz soha”
Joriy yilning 3-iyulida Madaniyat va turizm vazirligida bo‘lib o‘tgan tadbirda madaniyat va turizm vaziri o‘rinbosari Bahodir Ahmedov konsertdan tushgan pullarni Rossiyaning Ukrainaga bosqinchiligini moliyalashtirishga sarflayotgan Z-artistlarning O‘zbekistondagi konsertlari nega bekor qilinmayotgani haqidagi savolga bergan javobi muhokamalarga sabab bo‘lgandi.
“Qaysi davlatdan kelayotgan bo‘lsa, sanʼatni hurmat qilaman, xalqqa xizmat qilaman, sanʼatning cho‘qqisini ko‘rsataman, deb kelayotgan bo‘lsa va u haqiqiy sanʼatkor bo‘lsa, O‘zbekiston hech qaysi sanʼatkorga eshikni yopib, tambalab qo‘ygan joyi yo‘q. Kelyapti, sanʼatni namoyish qilyapti, olqishini olyapti, ketyapti. O‘zbekistonda sanʼatga to‘siqning o‘zi yo‘q”, — degan Bahodir Ahmedov.
Madaniyat vazirining o‘rinbosari “X-faktor” shousini tanqid qilgani ham ko‘plab eʼtirozlarga sabab bo‘lgan.
“Ishtirokchi bir paytlar “zona”ning ashulalari deyiladigan qo‘shiqlarini ijro etib o‘tiribdi, bittasi shlyapani kiyib olib, ura deb qo‘llab-quvvatlayapti”, — degan vazir o‘rinbosari ko‘rsatuv haqida.
Bu fikrlarga nisbatan telekanal Instagram dagi profilida bunga munosabat bildirgan.
“X-faktor” tanlov emas, aksincha, havaskor ijrochilar o‘rtasidagi global shou hisoblanadi. Mazkur shouda qatnashchilarning vokal imkoniyatlari bilan birga ularni sahnada shou yarata olishi, hakamlar va tomoshabinlar eʼtiborini o‘ziga qarata olishiga ham baho beriladi. X-faktor shousi qatnashchilari hakamlar tomonidan “Ha” yoki “Yo‘q” degan ovoz berishi asosida baholanadi. Madaniyat vazirligining mulozimi taʼkidlaganidek, ishtirokchilar 10 ballik sistemada baholanmaydi va umuman ballar ishlatilmaydi. Shuning uchun, vazir o‘rinbosari , “X-faktor” shousining hech bo‘lmaganda 1 ta epizodini to‘liq ko‘rib chiqishi va shundan keyin fikr bildirishini tavsiya qilamiz” — deya munosabat bildirilgan mulozim chiqishiga.
Hokim va direktor mojarosi
Avgust oyida ijtimoiy tarmoqlarda Surxondaryo viloyati hokimi Ulug‘bek Qosimov va Sariosiyo tumanidagi 28-maktab direktori Umida Tursunova o‘rtasidagi mojaro aks etgan video tarqaldi. Tasvirda hokim yig‘ilishda direktorni ishdan bo‘shatishni buyurgani va o‘rtada tortishuv yuzaga kelgani ko‘rinadi.
“Butun dunyoga sharmanda bo‘ldingiz. Jim o‘tiring. Haqqingiz yo‘q bu maktabda direktor bo‘lib ishlashga” — degan hokim direktorga.
Keyin direkor qamoqqa olingan. Voqea ijtimoiy tarmoqlar faollarini “oyoqqa turgazdi”. Surxondaryo hokimi mansab vakolatini suiisteʼmol qilgani bot–bot taʼkidlandi. Maktabgacha va maktab taʼlimi vaziri Hilola Umarova vaziyatga aralashib, direktor qamoqdan ozod qilingani, vazir shaxsan vazirning nazoratida ekanini maʼlum qilgan.
Umuman olganda, avvalgi yillardagi kabi 2023-yilda ham yuqoridagi va boshqa bir qator iqtiboslar bilan tarixda qoladi deyish mumkin.
Izoh (0)