Rossiya shaharlarida bayram salyutlari bekor qilinmoqda

Magadan meri Yuriy Grishan Belgoroddagi odamlarning o‘limi tufayli shahardagi barcha rasmiy Yangi yil tantanalarini bekor qildi.

“Hurmatli Magadan aholisi, ishonchim komilki, hamma Belgorodda sodir bo‘lgan so‘nggi voqealarni kuzatib bormoqda. Belgorodning o‘qqa tutilishida halok bo‘lganlarning oila a’zolari va yaqinlariga chuqur hamdardlik bildiraman. Shundan kelib chiqqan holda, Yangi yil tadbirlarini o‘tkazishni noo‘rin deb hisoblayman”, — deb yozdi Grishan Telegram dagi kanalida.

Rossiyaning boshqa shaharlari — Vladivostok, Blagoveshchensk, Petropavlovsk-Kamchatskiyda ham Yangi yil tantanalari, jumladan bayram salyutlari bekor qilindi.

Ukraina harbiylari 30-dekabr kuni tushdan keyin Belgorod shahri markazini o‘qqa tutdi.

Hodisa oqibatida, dastlabki ma’lumotlariga ko‘ra, 14 kishi halok bo‘lgan, yuzdan ortiq kishi jarohatlangan. Guvohlar otishmani urush boshlanganidan beri eng og‘ir otishmalardan biri deb atagan.

Bugun 31-dekabr kuni yangilangan ma’lumotlarga ko‘ra, Belgoroddagi otishma qurbonlari soni 24 nafarga yetgan. Bu haqida Belgorod gubernatori Vyacheslav Gladkov Telegram dagi kanalida ma’lum qildi.