Serbiya prezidenti Aleksandr Vuchich mamlakatda inqilob yoki hokimiyatni zo‘ravonlik bilan qo‘lga kiritishning iloji yo‘qligini ma’lum qildi.
“30-dekabr kuni ayrim saylov uchastkalarida o‘tkazilgan takroriy ovoz berish natijalariga ko‘ra, mamlakat aholisi hukmron koalitsiyani qo‘llab-quvvatlashini ochiq-oydin bildirgan”, — dedi Vuchich.
“Hech qanday inqiloblar bo'lmaydi, hokimiyatni zo'ravonlik bilan egallab olish ham bo'lmaydi. Xalq kimni qo'llab-quvvatlashini aniq aytdi. Bu muhim ahamiyatga ega”, — deya ta’kidladi prezident.
Serbiyada 17-dekabr kuni navbatdan tashqari parlament va munitsipal saylovlar bo‘lib o‘tdi. “Aleksandar Vuchich — Serbiya to'xtamasligi kerak” koalitsiyasi saylovda g‘alaba qozondi.
Ikkinchi o‘rinni egallagan muxolif “Serbiya zo‘ravonlikka qarshi” bloki vakillari ovoz berish natijalari soxtalashtirilganini da‘vo qilmoqda. 18-dekabr kuni muxolifat Belgraddagi Respublika saylov komissiyasi binosi yonida qator mitinglarni boshladi va 24-dekabr kuni ular poytaxt ma’muriyatiga bostirib kirishga urindi.
Tartibsizliklar politsiya tomonidan bostirildi, 38 kishi hibsga olindi, 7 nafari o‘z aybiga iqror bo‘ldi. Vuchich Belgrad maʼmuriyatini egallab olishga urinishni respublika suverenitetiga hujum deb atadi.
Izoh (0)