AQSH aholini ro‘yxatga olish byurosi ma’lumotlariga ko‘ra, 2023-yil davomida dunyo aholisi 75 million kishiga ortdi.
Prognozlarda keltirilishicha, 2024-yil 1-yanvarda sayyora aholisi 8 milliard 19 million 876 ming kishiga yetadi.
Byuro ma’lumotlariga ko‘ra, 2024-yil boshida dunyo bo‘ylab har soniyada 4,3 nafar bola tug‘iladi va ikki kishi vafot etadi. AQSHning o‘zida aholi o‘sishi 0,53 foizni tashkil etgan bo‘lib, bu o‘rtacha ko‘rsatkichdan biroz ko‘proq. Yangi yilda mamlakat aholisi 335,8 millionga yetadi.
“2024-yil boshida AQSHda har to‘qqizinchi soniyada chaqaloq tug‘iladi, har 9,5 soniyada bir kishi vafot etadi. Ammo immigratsiya hisobiga aholi soni qisqarmaydi. Xalqaro migratsiya sabab AQSH aholisi har 28,3 soniyada bir kishiga ko‘payadi”, — deyiladi xabarda.
Eslatib o‘tamiz, dunyo aholisi 2022-yil 15-noyabr kuni 8 milliard nafarga yetgandi. Dunyo aholisining 6 milliarddan 7 milliardgacha o‘sishi uchun (1998-yildan 2010-yilgacha) o‘n ikki yil kerak bo‘ldi. 8 milliardlik aholi soniga yetish ham xuddi shuncha vaqt talab qildi.
Izoh (0)