Ukraina bosh vaziri Denis Shmigal xalqaro donorlar bilan shoshilinch uchrashuv o‘tkazishni so‘radi, chunki Kiyev 2024-yilgi budjeti bo‘yicha “juda yuqori noaniqlik”ka duch kelmoqda. Bu haqda Bloomberg agentligi Ukraina bosh vazirining Donorlarni muvofiqlashtirish bo‘yicha idoralararo platformasiga yo‘llagan maktubiga asoslanib xabar berdi.
“Makroiqtisodiy barqarorlikni saqlab qolish uchun 2024-yil yanvaridan boshlab yetarli darajada tezkor tashqi moliyalaviy yordam olishimiz juda muhim”, — deya Shmigalning maktubidan iqtibos keltiradi Bloomberg.
Ukraina bosh vazirining so‘zlariga ko‘ra, muvofiqlashtiruvchi guruh “shoshilinch budjet ehtiyojlariga” e’tibor qaratishi kerak. Uning aniqlik kiritishicha, gap hukumat ishini saqlab qolish, o‘qituvchilar va davlat xizmatchilariga to‘lovlar, shuningdek, pensiyalar haqida bormoqda.
“Biz 2024-yilda omon qolish ustuvorliklariga erishish uchun kurashayotgan bir paytda (uzoq muddatli) tiklanish va rekonstruksiya loyihalari haqida hech qanday muhokamaga hojat yo‘q”, — deyiladi maktubda.
Bloomberg qayd etishicha, Ukraina ittifoqchilarining xatga munosabati noma’lum.
Ukraina iqtisodiyot vaziri Yuliya Sviridenko Financial Times gazetasiga bergan intervyusida, agar G‘arb 2024-yil boshida moliyaviy yordam bermasa, Ukraina deyarli 12 million kishining maoshi va pensiyalarini to‘lashda kechikishlarga duch kelishi mumkinligini aytgandi. Uning aniqlik kiritishicha, Kiyev 500 ming davlat xizmatchisi va 1,4 million o‘qituvchiga, shuningdek, 10 million nafaqaxo‘rga o‘z vaqtida pul bera olmasligi mumkin.
Izoh (0)