AQSHning Florida shtatida 14 yoshli o‘smir Rojdestvo bayramiga sovg‘a sotib olayotgan vaqtda kelib chiqqan janjaldan keyin o‘z opasini otib o‘ldirdi.
CBS News telekanali xabar berishicha, 14 yoshli o‘smir onasi, 15 yoshli akasi, 23 yoshli opasi va jiyanlari bilan savdo markaziga borgan. Do‘konda u akasi bilan Rojdestvo sovg‘alari ustida janjallashgan.
“Ular kimga qanday va necha pullik sovg‘a olish masalasida tortisha boshlagan, savdo markazida katta janjal bo‘lgan”, — dedi Pinellas okrugi sherifi Bob Gualtyeri.
Bolalar uyga, buvisining oldiga qaytganidan keyin ham janjalni davom ettirgan. Bir payt 14 yoshli o‘smir yarim avtomat to‘pponchani qo‘liga olib, akasini nishonga olgan va boshiga o‘q uzish bilan tahdid qilgan. Qolganlar zo‘ravon o‘smirni eshikdan haydab chiqarishgan. O‘sha paytda tashqarida turgan opa ukasini tinchlantirishga va uni Rojdestvoda bunday tomosha ko‘rsatmaslikka ko‘ndirishga uringan.
Bunga javoban jahli chiqqan o‘smir opasini haqoratlay boshlagan va “uni bolasiga qo‘shib otib tashlash” bilan tahdid qilgan. Kutilmaganda o‘smir tepkini bosib yuborgan. O‘q 23 yoshli ayolning ko‘kragiga tegib, o‘pkasini teshib o‘tgan. O‘q ovozini eshitgan ikkinchi o‘smir boshqa qurol bilan uydan otilib chiqib, ukasining qorniga o‘q uzgan, shundan so‘ng qurolni chiqindi qutisiga tashlab, qochib ketgan.
O‘smirlarning opasi shifoxonada vafot etdi. 14 yoshli uka operatsiya qilindi va hozir kasalxonada ahvoli barqaror. U birinchi darajali qotillik, bolalarga nisbatan zo‘ravonlik (jiyaniga tahdid qilgani uchun) va noqonuniy qurol saqlashda ayblanmoqda.
Keyinroq 15 yoshli ikkinchi o‘smir qarindoshlarining uyida hibsga olindi. U qotillikka urinish va dalillarni yashirishga urinishda ayblandi.
Politsiya xodimlarining aniqlashicha, ikkala o‘smir ham ilgari avtomashinalarni o‘margani uchun qo‘lga olingan.
“14 va 15 yoshli bu bolalar doim yonida qurol olib yurishgan. Huquqbuzar yigitchalar qurol ko‘tarib yurganda mana nima bo‘ladi. Ular nimadandir xafa bo‘ladi, muammoni qanday hal qilishni bilmay bir-birga o‘q uzishni boshlaydi”, — dedi Sherif Gualtyeri.
Izoh (0)