АҚШнинг Флорида штатида 14 ёшли ўсмир Рождество байрамига совға сотиб олаётган вақтда келиб чиққан жанжалдан кейин ўз опасини отиб ўлдирди.
CBS News телеканали хабар беришича, 14 ёшли ўсмир онаси, 15 ёшли акаси, 23 ёшли опаси ва жиянлари билан савдо марказига борган. Дўконда у акаси билан Рождество совғалари устида жанжаллашган.
“Улар кимга қандай ва неча пуллик совға олиш масаласида тортиша бошлаган, савдо марказида катта жанжал бўлган”, — деди Пинeллас округи шерифи Боб Гуалтери.
Болалар уйга, бувисининг олдига қайтганидан кейин ҳам жанжални давом эттирган. Бир пайт 14 ёшли ўсмир ярим автомат тўппончани қўлига олиб, акасини нишонга олган ва бошига ўқ узиш билан таҳдид қилган. Қолганлар зўравон ўсмирни эшикдан ҳайдаб чиқаришган. Ўша пайтда ташқарида турган опа укасини тинчлантиришга ва уни Рождествода бундай томоша кўрсатмасликка кўндиришга уринган.
Бунга жавобан жаҳли чиққан ўсмир опасини ҳақоратлай бошлаган ва “уни боласига қўшиб отиб ташлаш” билан таҳдид қилган. Кутилмаганда ўсмир тепкини босиб юборган. Ўқ 23 ёшли аёлнинг кўкрагига тегиб, ўпкасини тешиб ўтган. Ўқ овозини эшитган иккинчи ўсмир бошқа қурол билан уйдан отилиб чиқиб, укасининг қорнига ўқ узган, шундан сўнг қуролни чиқинди қутисига ташлаб, қочиб кетган.
Ўсмирларнинг опаси шифохонада вафот этди. 14 ёшли ука операция қилинди ва ҳозир касалхонада аҳволи барқарор. У биринчи даражали қотиллик, болаларга нисбатан зўравонлик (жиянига таҳдид қилгани учун) ва ноқонуний қурол сақлашда айбланмоқда.
Кейинроқ 15 ёшли иккинчи ўсмир қариндошларининг уйида ҳибсга олинди. У қотилликка уриниш ва далилларни яширишга уринишда айбланди.
Полиция ходимларининг аниқлашича, иккала ўсмир ҳам илгари автомашиналарни ўмаргани учун қўлга олинган.
“14 ва 15 ёшли бу болалар доим ёнида қурол олиб юришган. Ҳуқуқбузар йигитчалар қурол кўтариб юрганда мана нима бўлади. Улар нимадандир хафа бўлади, муаммони қандай ҳал қилишни билмай бир-бирга ўқ узишни бошлайди”, — деди Шериф Гуалтери.
Изоҳ (0)