“Yevropa Rossiyani o‘z chegaralariga yaqinlashtirmasligi kerak” — Chexiya tashqi ishlar vaziri

Yevropa Rossiyani imkon qadar o‘z chegaralaridan uzoqlashtirishi kerak va buning uchun Ukrainaga yordam berishda davom etishi kerak. Bu haqda Chexiya tashqi ishlar vaziri Yan Lipavskiy CTK telekanaliga bergan intervyusida aytib o‘tdi.

“Ukrainani qo‘llab-quvvatlash orqali biz Rossiyaning Markaziy Yevropa mintaqasi, Boltiqbo‘yi mamlakatlaridagi imperialistik ekspansiyasini to‘xtatayotganimizni unutmasligimiz kerak”, — dedi vazir.

Unga ko‘ra, Ukrainaga berilayotgan harbiy, gumanitar, moliyaviy, siyosiy yoki ma’naviy yordam Yevropa xavfsizligiga foyda keltiradi.

“Agar Ukraina mag‘lub bo‘lsa, Rossiya bizning chegaralarimizga tom ma’noda yanada yaqinlashadi. Shu sababli biz bunga yo‘l qo‘ymasligimiz kerak”, — dedi Yan Lipavskiy.

Lipavskiyning fikricha, Yevropa davlatlarining “urushdan charchashi” turlicha namoyon bo‘lmoqda.

“Ammo agar biz o‘z xavfsizligimizni ta’minlashdan charchagan bo‘lsak, ham erkinlikdan, ham suverenitetdan mahrum bo‘lamiz”, — dedi vazir.

Lipavskiy Yevropa mamlakatlari aholisiga Rossiya bilan urushda Ukrainaga yordam berishda davom etish nega muhimligini tushuntirish kerak, deb hisoblamoqda.

“Yevropaning barcha aholisiga gapim shuki, bizning asosiy vazifamiz Rossiyani chegaralarimizdan imkon qadar uzoqroq tutish. Siyosatimiz shunga qaratilgan bo‘lishi kerak”, — dedi Lipavskiy.