Европа Россияни имкон қадар ўз чегараларидан узоқлаштириши керак ва бунинг учун Украинага ёрдам беришда давом этиши керак. Бу ҳақда Чехия ташқи ишлар вазири Ян Липавский CТК телеканалига берган интервьюсида айтиб ўтди.
“Украинани қўллаб-қувватлаш орқали биз Россиянинг Марказий Европа минтақаси, Болтиқбўйи мамлакатларидаги империалистик экспансиясини тўхтатаётганимизни унутмаслигимиз керак”, — деди вазир.
Унга кўра, Украинага берилаётган ҳарбий, гуманитар, молиявий, сиёсий ёки маънавий ёрдам Европа хавфсизлигига фойда келтиради.
“Агар Украина мағлуб бўлса, Россия бизнинг чегараларимизга том маънода янада яқинлашади. Шу сабабли биз бунга йўл қўймаслигимиз керак”, — деди Ян Липавский.
Липавскийнинг фикрича, Европа давлатларининг “урушдан чарчаши” турлича намоён бўлмоқда.
“Аммо агар биз ўз хавфсизлигимизни таъминлашдан чарчаган бўлсак, ҳам эркинликдан, ҳам суверенитетдан маҳрум бўламиз”, — деди вазир.
Липавский Европа мамлакатлари аҳолисига Россия билан урушда Украинага ёрдам беришда давом этиш нега муҳимлигини тушунтириш керак, деб ҳисобламоқда.
“Европанинг барча аҳолисига гапим шуки, бизнинг асосий вазифамиз Россияни чегараларимиздан имкон қадар узоқроқ тутиш. Сиёсатимиз шунга қаратилган бўлиши керак”, — деди Липавский.
Изоҳ (0)