Yevropa Ittifoqi sudi Superliga foydasiga qaror chiqardi.
Sud “FIFA va UEFA hukmronlik mavqeini suiiste’mol qilmoqda” degan qarorga keldi. Ushbu tashkilotlarning Superliga oid qoidalari raqobat va xizmat erkinligi qonunlariga zid deb topildi.
“FIFA va UEFA qoidalariga ko‘ra, Superliga kabi klublararo yangi futbol loyihasi ular tomonidan ma’qullanishi lozim, bu esa Yevropa Ittifoqi qonunchiligiga zid. Klublar va futbolchilarni boshqa musobaqalarda o‘ynashini taqiqlash noqonuniy hisoblanadi.
Shu bilan birga, sud FIFA va UEFAning OAV huquqlaridan foydalanishga oid qoidalari Yevropa klublariga, media bozodlarida faoliyat yurituvchi barcha kompaniyalarga, shuningdek, iste’molchilar va teletomoshabinlarga zarar yetkazishi va ularning yangi, potensial innovatsion yoki qiziqarli musobaqalardan bahramand bo‘lishiga to‘sqinlik qilishini ta’kidlaydi”, — deyiladi sud qarorida.
Eslatib o‘tamiz, 2021-yilda Madridning tijorat sudi “Real”, “Barselona” va “Yuventus” klublari Yevropa Superligasini tashkil etishga urinish bo‘yicha intizomiy ish yuritishni to‘xtatishni talab qilinganda, ularning tarafini olgandi.
UEFA sudya Manuel Ruiz de Laraning talabini qondirishni rad etdi. Shundan so‘ng ish Yevropa sudiga qadar yetib bordi.
Hozirda Superliga loyihasida “Real” hamda “Barselona” klublari qolgan.
Superliga bosh direktori esa Yevropa Ittifoqining qaroridan mamnunligini bildirdi: “Biz raqobatda yengib chiqdik. UEFA monopoliyasi tugadi.
Futbol endi erkin bo‘ldi. Klublar hech qanday taqiqlardan qo‘rqmasdan o‘z kelajagini o‘zi hal qilishga haqli bo‘ladi”, — deydi Bernd Rayxart.
La Liga klublari esa Yevropa Superligasiga qarshi aksiya o‘tkazmoqchi. Onda Cero nashrining xabariga ko‘ra, 18-tur o‘yinlarda “Real”dan boshqa barcha jamoalar “Maydonda g‘alaba qozoning” degan yozuv tushirilgan liboslarda maydonga tushadi.
21-dekabr kuni chempionatning 4 ta o‘yini bo‘lib o‘tadi: “Kadis” — “Real Sosyedad”, “Betis” — “Jirona”, “Alaves” — “Real”, “Malyorka” — “Osasuna”.
Izoh (0)