Turkiyaning 2-divizionidan o‘rin olgan o‘yinda futbolchilar o‘rtasida ommaviy mushtlashuv yuz berdi. Hakam 5 nafar o‘yinchiga qizil kartochka ko‘rsatdi (video)

Futbol bo‘yicha Turkiya chempionati 2-divizionidan o‘rin olgan o‘yinda ommaviy mushtlashuv yuz berdi.

Voqea 2-divizion 18-turidan o‘rin olgan “Bursaspor” va “Diyorbakirspor” o‘rtasidagi bahsda yuz bergan.

O‘yin 2:0 hisobida “Diyorbakirspor” foydasiga hal bo‘layotgan payt, mehmonlar futbolchisi Bunyamin Gezer ikkinchi golni urganidan so‘ng “Bursaspor” futbolchisi Chag‘atay Yilmaz bilan bahslashib qoldi. 

Yilmaz qizil kartochka olganidan so‘ng, jamoalar futbolchilari o‘rtasida mushtlashuv boshlanib, unga politsiya aralashishga majbur bo‘ldi. Janjal vaqtida muxlislar tribunadan maydonga turli xil narsalarni uloqtirgan. 

Hodisa oqibatida “Diyorbakirspor”ning uch nafar futbolchisi va “Bursaspor”ning ikki nafar futbolchisi qizil kartochka oldi. Shuningdek, “Bursaspor” futbolchilari “Diyorbakirspor” o‘yinchisi kiyim almashtirish xonasiga qochayotganda, uni ta’qib qilgani ma’lum bo‘lgan.

Voqea bo‘yicha Turkiya futbol federatsiyasi hali munosabat bildirmadi.