Европа Иттифоқи суди Суперлига фойдасига қарор чиқарди.
Суд “ФИФА ва УЕФА ҳукмронлик мавқеини суиистеъмол қилмоқда” деган қарорга келди. Ушбу ташкилотларнинг Суперлига оид қоидалари рақобат ва хизмат эркинлиги қонунларига зид деб топилди.
“ФИФА ва УЕФА қоидаларига кўра, Суперлига каби клублараро янги футбол лойиҳаси улар томонидан маъқулланиши лозим, бу эса Европа Иттифоқи қонунчилигига зид. Клублар ва футболчиларни бошқа мусобақаларда ўйнашини тақиқлаш ноқонуний ҳисобланади.
Шу билан бирга, суд ФИФА ва УЕФАнинг ОАВ ҳуқуқларидан фойдаланишга оид қоидалари Европа клубларига, медиа бозодларида фаолият юритувчи барча компанияларга, шунингдек, истеъмолчилар ва телетомошабинларга зарар етказиши ва уларнинг янги, потенциал инновацион ёки қизиқарли мусобақалардан баҳраманд бўлишига тўсқинлик қилишини таъкидлайди”, — дейилади суд қарорида.
Эслатиб ўтамиз, 2021 йилда Мадриднинг тижорат суди “Реал”, “Барселона” ва “Ювентус” клублари Европа Суперлигасини ташкил этишга уриниш бўйича интизомий иш юритишни тўхтатишни талаб қилинганда, уларнинг тарафини олганди.
УЕФА судья Мануэл Руиз де Ларанинг талабини қондиришни рад этди. Шундан сўнг иш Европа судига қадар етиб борди.
Ҳозирда Суперлига лойиҳасида “Реал” ҳамда “Барселона” клублари қолган.
Суперлига бош директори эса Европа Иттифоқининг қароридан мамнунлигини билдирди: “Биз рақобатда енгиб чиқдик. УЕФА монополияси тугади.
Футбол энди эркин бўлди. Клублар ҳеч қандай тақиқлардан қўрқмасдан ўз келажагини ўзи ҳал қилишга ҳақли бўлади”, — дейди Бернд Райхарт.
Ла Лига клублари эса Европа Суперлигасига қарши акция ўтказмоқчи. Onda Cero нашрининг хабарига кўра, 18-тур ўйинларда “Реал”дан бошқа барча жамоалар “Майдонда ғалаба қозонинг” деган ёзув туширилган либосларда майдонга тушади.
21 декабрь куни чемпионатнинг 4 та ўйини бўлиб ўтади: “Кадис” — “Реал Сосьедад”, “Бетис” — “Жирона”, “Алавес” — “Реал”, “Мальорка” — “Осасуна”.
Изоҳ (0)