Qirg‘iziston va O‘zbekiston 2024-yildan boshlab 12 ta avtomobil modelini qo‘shma ishlab chiqarishni yo‘lga qo‘yadi. Bu haqda Qirg‘iziston iqtisodiyot va savdo vaziri Doniyor Amangeldiyevga tayanib, “Kabar” xabar berdi.
Ayni paytda “Oltin Tulpor” avtomobil yig‘ish zavodini ishga tushirishga hozirlik ko‘rilmoqda. Qo‘shma loyiha “O‘zAvtoSanoat” bilan birga. O‘ylaymanki, kelgusi yilda u allaqachon mo‘ljallangan loyiha quvvatida ishga tushadi. Qurilish va foydalanishga topshirish ishlari yakunlanmoqda, — dedi u.
Vazirning taʼkidlashicha, loyiha O‘zbekiston—Qirg‘iziston taraqqiyot jamg‘armasi tomonidan moliyalashtiriladi.
27-yanvar kuni O‘zbekiston prezidentining davlat tashrifi doirasida Qirg‘izistonda avtomobil va tijorat avtomobillarini ishlab chiqarishni tashkil etish bo‘yicha hamkorlik to‘g‘risidagi bitim imzolangandi. Loyihaga ko‘ra, u uch bosqichda amalga oshiriladi.
- Dastlabki uch yil ichida 10 mingta avtomobil va tijorat avtomobillari ishlab chiqariladi. Ishlab chiqarishga 500 kishi jalb qilinadi. Mahalliylashtirish 5-10 foizni tashkil qiladi.
- Ikkinchi bosqichda avtomobil butlovchi qismlarini ishlab chiqarishni tashkil etish va ishlash quvvatini 20 mingtagacha avtomobil va tijorat avtomobillariga yetkazish nazarda tutilgan. Mahalliylashtirish 15-20 foiz, ish o‘rinlari soni esa 1000 ta bo‘ladi.
- Keyinchalik ishlab chiqarish hajmi 30 mingtagacha yengil va tijorat avtomobillariga, korxonada ishchilar soni esa 2000 kishiga yetkaziladi.
Loyiha bo‘yicha dastlabki memorandum 2017-yilda imzolangan bo‘lib, unga ko‘ra, 2018-yil oxirigacha Isuzu avtobuslari va Ravon avtomobillarini ishlab chiqarishni yo‘lga qo‘yish rejalashtirilgandi.
2017-yilning dekabr oyida Bishkekda Ravon R2, Ravon Nexia R3, Ravon R4, shuningdek, Ravon Gentra avtomobillarining taqdimoti va test drayveri bo‘lib o‘tgan. Ushbu mashinalarni Qirg‘izistonda ishlab chiqarishni boshlash rejalashtirilgan edi.
Izoh (0)