Қирғизистон ва Ўзбекистон 2024 йилдан бошлаб 12 та автомобиль моделини қўшма ишлаб чиқаришни йўлга қўяди. Бу ҳақда Қирғизистон иқтисодиёт ва савдо вазири Дониёр Амангелдиевга таяниб, “Кабар” хабар берди.
Айни пайтда “Олтин Тулпор” автомобиль йиғиш заводини ишга туширишга ҳозирлик кўрилмоқда. Қўшма лойиҳа “ЎзАвтоСаноат” билан бирга. Ўйлайманки, келгуси йилда у аллақачон мўлжалланган лойиҳа қувватида ишга тушади. Қурилиш ва фойдаланишга топшириш ишлари якунланмоқда, — деди у.
Вазирнинг таъкидлашича, лойиҳа Ўзбекистон—Қирғизистон тараққиёт жамғармаси томонидан молиялаштирилади.
27 январь куни Ўзбекистон президентининг давлат ташрифи доирасида Қирғизистонда автомобиль ва тижорат автомобилларини ишлаб чиқаришни ташкил этиш бўйича ҳамкорлик тўғрисидаги битим имзоланганди. Лойиҳага кўра, у уч босқичда амалга оширилади.
- Дастлабки уч йил ичида 10 мингта автомобиль ва тижорат автомобиллари ишлаб чиқарилади. Ишлаб чиқаришга 500 киши жалб қилинади. Маҳаллийлаштириш 5-10 фоизни ташкил қилади.
- Иккинчи босқичда автомобиль бутловчи қисмларини ишлаб чиқаришни ташкил этиш ва ишлаш қувватини 20 мингтагача автомобиль ва тижорат автомобилларига етказиш назарда тутилган. Маҳаллийлаштириш 15-20 фоиз, иш ўринлари сони эса 1000 та бўлади.
- Кейинчалик ишлаб чиқариш ҳажми 30 мингтагача енгил ва тижорат автомобилларига, корхонада ишчилар сони эса 2000 кишига етказилади.
Лойиҳа бўйича дастлабки меморандум 2017 йилда имзоланган бўлиб, унга кўра, 2018 йил охиригача Isuzu автобуслари ва Ravon автомобилларини ишлаб чиқаришни йўлга қўйиш режалаштирилганди.
2017 йилнинг декабрь ойида Бишкекда Ravon R2, Ravon Nexia R3, Ravon R4, шунингдек, Ravon Gentra автомобилларининг тақдимоти ва тест драйвери бўлиб ўтган. Ушбу машиналарни Қирғизистонда ишлаб чиқаришни бошлаш режалаштирилган эди.
Изоҳ (0)