Qirg‘izistonning Ola-Buqa viloyatida chegarachilar kontrabandaga yordam bergani uchun qo‘lga olindi. Bu haqda Milliy xavfsizlik davlat qo‘mitasiga tayanib, 24.kg xabar berdi.
Xabarga ko‘ra, 17-dekabrdan 18-dekabrga o‘tar kechasi chegarachilar “Baymak-Avtodorojniy” nazorat-o‘tkazish punktida ish vaqtidan tashqari kontrabanda yuklarini o‘tkazib yuborishgan. O‘sha paytda ular qo‘lga olingan. Nazorat-o‘tkazish punktidan chegarachilar yuklarni shu yo‘l bilan muntazam ravishda o‘tkazgan.
“Chegara xizmati harbiylari moliyaviy mukofot uchun tungi vaqtda tovarlar kontrabandasida faol ishtirok etgan. Shu tariqa kontrabandaning barqaror kanali tashkil etilgan va u faol ishlagan. Shu bilan birga, ular o‘zlarining jinoiy harakatlarini yashirish maqsadida nazorat-o‘tkazish punktidagi videokuzatuv kameralari yozib olishiga yo‘l qo‘ymaslik uchun rejimdagi obyektning butun hududida elektr ta’minotini uzib qo‘ygan”, — deyiladi xabarda.
Bundan tashqari, mazkur chegarachilar nazorat-o‘tkazish punktini chetlab o‘tib, o‘tish joyi orqali noqonuniy migratsiya kanalini tashkil qilgan.
“Baymak-Avtodorojniy” nazorat-o‘tkazish punktining sakkiz nafar harbiy xizmatchisi va kontrabanda bilan shug‘ullangan besh nafar fuqaro qo‘lga olindi. Hozirda tergov harakatlari olib borilmoqda, — dedi Milliy xavfsizlik davlat qo‘mitasi va qo‘lga olish Chegara xizmati rahbariyati ko‘magida amalga oshirilganini qo‘shimcha qildi.
Izoh (0)